గ్యారేజ్ టీజర్లో ఎన్టీఆర్ డైలాగే హైలైట్

ఈ ఏడాది మోస్ట్ అవైటెడ్ తెలుగు మూవీస్ లో ఒకటైన ‘జనతా గ్యారేఝ్’ విడుదలకు ఇంకో ఐదు వారాలు మాత్రమే సమయముంది. ఇప్పటికే టాకీ పార్ట్ పూర్తి చేసేసిన గ్యారేజ్ టీమ్.. పోస్ట్ ప్రొడక్షన్ కార్యక్రమాల్లో బిజీ అయిపోయింది. ఆర్టిస్టులు ఒక్కొక్కరుగా డబ్బింగ్ కానిచ్చేస్తున్నారు. మరోవైపు సినిమా ప్రమోషన్ వ్యవహారాలు కూడా మొదలైపోతున్నాయి. ఇంకో రెండు రోజుల్లో.. అంటే బుధవారమే ‘జనతా గ్యారేజ్’ టీజర్ ప్రేక్షకుల ముందుకొచ్చేస్తుంది. ఈ టీజర్ గురించి యూనిట్ సభ్యులు చెబుతున్న మాటలు వింటుంటే.. ఇప్పటికే సినిమా మీద ఉన్న అంచనాలు మరింత పెరిగిపోతున్నాయి.

నిమిషం లోపు నిడివి ఉండే ‘జనతా గ్యారేజ్’ టీజర్ చాలా స్టైలిష్ గా.. ఆకర్షణీయంగా ఉంటుందని సమాచారం. దేవిశ్రీ ప్రసాద్ అదిరిపోయే రీరికార్డింగ్ చేశాడట ఈ టీజర్ కు. ఎన్టీఆర్ లుక్.. డైలాగ్ డెలివరీ చాలా కొత్తగా ఉంటాయని.. అభిమానుల్ని అతను మెస్మరైజ్ చేస్తాడని అంటున్నారు. ముఖ్యంగా ఈ టీజర్ చివర్లో వచ్చే పవర్ ఫుల్ డైలాగ్ హైలైట్ గా ఉంటుందని.. కొరటాల మార్కు ఈ డైలాగులో కనిపిస్తుందని.. టీజర్ రిలీజయ్యాక ఈ డైలాగ్ మార్మోగిపోవడం ఖాయమని చెబుతున్నారు. ఓ ఈవెంట్ మేనేజ్మెంట్ కంపెనీ అధినేత ఈ డైలాగ్ గురించి ట్విట్టర్లో చేసిన వ్యాఖ్య ఆసక్తిని రేకెత్తిస్తోంది. దీంతో అభిమానులు చాలా ఆసక్తిగా టీజర్ కోసం ఎదురు చూస్తున్నారు. ఈ నెల 22న ‘జనతా గ్యారేజ్’ ఆడియోను విడుదల చేసి.. అనుకున్న ప్రకారమే ఆగస్టు 12న ఈ చిత్రాన్ని ప్రేక్షకుల ముందుకు తేవాలని చూస్తున్నారు.