నితిన్ సినిమాలో చాలా అట్రాక్షన్స్ ఉన్నాయ్

షూటింగ్ మధ్యలో ఆగిపోయినా.. రిలీజ్ పదే పదే వాయిదా పడినా.. ఆ సినిమాలు సరిగా ఆడవన్న సెంటిమెంటుంది టాలీవుడ్ లో. ఐతే మెజారిటీ సినిమాల కథ ఇలాగే ముగిసినా.. కొన్నిసార్లు ఆ సెంటిమెంటును తిరగరాసిన సినిమాలు కూడా లేకపోలేదు. తమ ‘కొరియర్ బాయ్ కళ్యాణ్’ కూడా ఆ జాబితాలోనే చేరుతుందని ఆశతో ఉన్నాడు నితిన్. నిజానికిది రెండేళ్ల ముందు రావాల్సిన సినిమా. అంటే అప్పటి ట్రెండుకు తగ్గట్లు తీసిన సినిమా. కానీ విజువల్స్, పాటలు చూస్తుంటే ఇది పాత సినిమా అన్న ఫీలింగేమీ కలగట్లేదు. ఫ్రెష్ లుక్ తోనే ఉంది. పైగా ప్రమోషన్స్ తో ఒక్కసారిగా మోతెక్కించేస్తున్నారు. దీంతో నెమ్మదిగా జనాలకు సినిమా మీద ఆసక్తి పుడుతోంది.

‘కొరియర్ బాయ్ కళ్యాణ్’ విషయంలో స్పెషల్ అట్రాక్షన్స్ కి కొదవేమీ లేదు. గౌతమ్ మీనన్ లాంటి టాప్ డైరెక్టర్ ప్రొడ్యూస్ చేస్తున్న సినిమా అంటే కంటెంట్ ఉంటుందని ఆశించొచ్చు. తమిళ, తెలుగు సీరియల్స్ తో నటుడిగా మంచి పేరు తెచ్చుకున్న ప్రేమ్ సాయి ఈ సినిమాతో డైరెక్టరవుతుండటం విశేషం. కొరియర్ బాయ్ కళ్యాణ్ కి వాస్తవంగా సింగర్ కార్తీకే సంగీత దర్శకుడైనప్పటికీ నితిన్ ఫేవరెట్ మ్యూజిక్ డైరెక్టర్ అనూప్ తోనూ సెంటిమెంటుగా ఒకట్రెండు పాటలు చేయించారు. ఇంకో విశేషం ఏంటంటే.. బాలీవుడ్ సంగీత దర్శకుడు సందీప్ చౌతా ఆ సినిమాకు బ్యాగ్రౌండ్ స్కోర్ ఇచ్చాడు. అంటే ఈ సినిమాకు ముగ్గురు మ్యూజిక్ డైరెక్టర్లన్నమాట. రచన విషయంలోనూ ఇద్దరి హ్యాండ్ పడింది. నితిన్ సినిమాలకు వరుసగా పని చేస్తున్న హర్షవర్ధన్ తో పాటు స్టార్ రైటర్ కోన వెంకట్ కూడా మాటల సాయం అందిస్తున్నాడు. బాలీవుడ్ లక్కీ ఛార్మ్ యామి గౌతమ్ హీరోయిన్ గా నటిస్తుండటం కూడా విశేషమే. మొత్తానికి అదనపు ఆకర్షణలైతే చాలానే ఉన్నాయి. మరి సినిమా ఎలా ఉంటుందో?