ఓడినా గెలిచినా జోడీ జోడీనే

హీరో హీరోయిన్ల మధ్య కెమిస్ట్రీ కుదరాలేగానీ వాళ్ళ జోడీని ఎన్నిసార్లు చూసినా ముచ్చటే కలుగుతుంది గానీ మొహంమొత్తదు. అయితే సెంటిమెంట్ ల పుణ్యమా అని కెమిస్ట్రీ కుదిరినా సినిమాలు పరాజయం పాలవడంతో మరోసారి ఆ జోడీని పునరావృతం చెయ్యడానికి సంకోచించిన సందర్భాలూ వున్నాయి. అయితే ఇప్పుడా సెంటీ సిమెంట్ గోడలను బ్రద్దలు కొడుతూ ఓడినా గెలిచినా జోడీ జోడీనే అంటున్నారు.

బృందావనం సినిమాతో హిట్ కొట్టిన తారక్ సమంతాల జోడీ ఆతరువాత రామయ్యా వస్తావయ్యా - రభస సినిమాలలో వరుసగా కనిపించినా వాటి ఫలితం నిరాశ పరిచింది. అయినా సరే వెనకడుగు వేయకుండా కదానుగుణంగా ఇప్పుడు జనతా గ్యారేజ్ కి సైతం తారక్ సరసన సమంతానే ప్రిఫర్ చేసినట్టు తెలుస్తుంది. అలానే రామ్ చరణ్ - రకుల్ ప్రీత్ ల బ్రూస్ లీ ఫ్లాపయినా తన తదుపరి సినిమాలో చెర్రి మరోసారి రకుల్ తోనే జతకట్టనున్నాడు. బెంగాల్ టైగర్ జంట రవితేజ - రాశీఖన్నాలు బాక్స్ ఆఫీస్ దగ్గర బోల్తాపడ్డా మరోసారి కలిసి నటిస్తున్నారు.

ఈ జోడి హిట్ సినిమాలకు సైతం కొనసాగడం విశేషం. వెంకీ నయనతారల కాంబినేషన్ లో వచ్చిన రెండు సినిమాలు హిట్లే. ఇప్పుడు మారుతి దర్శకత్వంలో ముచ్చటగా మూడవసారి కలిసి చిందేయనున్నారు. అలానే జిల్ తో మెప్పించిన గోపీచంద్ - రాశీఖన్నాల జోడి మరోసారి ఆక్సిజెన్ లో మురిపించనుంది.