ఆఫ‌ర్ నిజ‌మైతే బ‌న్నీ ఫ్యాన్స్ కి పండ‌గే!

ఐకాన్ స్టార్ అల్లు అర్జున్ 'పుష్ప‌' మూవీతో ప్ర‌పంచ వ్యాప్తంగా భారీ క్రేజ్ ని సొంతం చేసుకున్నారు. ఈ మూవీలో తొలిసారి ఊర మాస్ పాత్ర‌లో బ‌న్నీ క‌నిపించ‌డంతో పుష్ప‌రాజ్ పాత్ర ప్ర‌తీ ఒక్క‌రినీ విశేషంగా ఆక‌ట్టుకుంది. సినిమాలోని శ్రీ‌వ‌ల్లి పాట‌కు బ‌న్నీ వేసిన ఫుట్ స్టెప్‌.. త‌గ్గేదేలే మేన‌రిజ‌మ్‌..త‌న‌ని ప్ర‌పంచ వ్యాప్తంగా వైర‌ల్ అయ్యేలా చేశాయి. పుష్ప సిగ్నేచ‌ర్ స్టెప్ ని ప్ర‌ముఖ క్రికెట‌ర్లు, హాలీవుడ్ స్టార్స్ సైతం అనుక‌రించ‌డం, రీల్స్ చేయ‌డం తెలిసిందే.

త్వ‌ర‌లోనే 'పుష్ప‌' సీక్వెల్ గా రాబోతున్న 'పుష్ప ది రూల్' ని ప్రారంభించ‌బోతున్నారు. ఇందుకు సంబంధించిన ఏర్పాట్లు కూడా చురుగ్గా జ‌రుగుతున్నాయి. వ‌చ్చే నెల నుంచి ఈ మూవీ రెగ్యుల‌ర్ షూటింగ్ ని భారీ స్థాయిలో ప‌ట్టాలెక్కించ‌బోతున్నారు.

ఇటీవ‌లే లాంఛ‌నంగా పూజా కార్య‌క్ర‌మాలు జ‌రిపిన విష‌యం తెలిసిందే. ఇదిలా వుంటే బ‌న్నీకి హాలీవుడ్ ఆఫ‌ర్ వ‌చ్చిన‌ట్టుగా వార్త‌లు వినిపిస్తున్నాయి. 'పుష్ప‌'లో బ‌న్నీ న‌ట‌న‌కు ఫిదా అయిపోయిన ఓ హాలీవుడ్ ద‌ర్శ‌కుడు బ‌న్నీతో ఓ సూప‌ర్ హీరో మూవీని ప్లాన్ చేస్తున్నాడ‌ని వార్త‌లు వినిపిస్తున్నాయి.

అల్లు అర్జున్ ఇటీవ‌ల త‌న ఫ్యామిలీతో క‌లిసి న్యూయార్క్ సిటీలో జ‌రిగిన 'ఆజాదీకా అమృత్ మ‌హోత్స‌వ్' వేడుక‌ల్లో పాల్గొన్నారు. ఈ సంద‌ర్భంగా న్యూయార్క్ లోని ఫెడ‌రేష‌న్ ఆఫ్ ఇండియా అసోసియేష‌న్ వారు నిర్వ‌హించిన భారీ పెరేడ్ కు బ‌న్నీ మార్ష‌ల్ గా వ్య‌వ‌హ‌రించారు.

దీనికి సంబంధించిన స‌ర్టిఫికెట్ ని న్యూయార్క్ మేయ‌న్ అల్లు అర్జున్ కు అందించిన విష‌యం తెలిసిందే. అయితే బ‌న్నీ న్యూయార్క్ లో వున్నాడ‌ని తెలిసి స‌ద‌రు హాలీవుడ్ డైరెక్ట‌ర్ బ‌న్నీని ప్ర‌త్యేకంగా క‌లిశార‌ని, త‌న సినిమా గురించి చ‌ర్చించార‌ని వార్త‌లు వినిపిస్తున్నాయి.

అయితే ఈ వార్త‌ల‌పై బ‌న్నీ టీమ్ మాత్రం ఎలాంటి వివ‌ర‌ణ ఇవ్వ‌డం లేదు. ఇదే నిజమైతే బ‌న్నీ ఫ్యాన్స్ కి పండ‌గే అంటున్నాయి ఇండ‌స్ట్రీ వ‌ర్గాలు. ప్ర‌స్తుతం 'పుష్ప 2' షూట్ కోసం రెడీ అవుతున్న బ‌న్నీ హాలీవుడ్ సినిమాకు సిద్ధ‌మేనా? ..అయితే ఆ విష‌యాన్ని ఎందుకు ప్ర‌క‌టించ‌డం లేదు? .. అంటే ఇది కేవ‌లం గాసిప్ మాత్ర‌మేనా అనే అనుమానాలు వ్య‌క్తం అవుతున్నాయి.