ఉయ్యాలవాడ కోసం గుర్రాలకు పూజలు

ఖైదీ నంబర్ 150తో మెగా కం బ్యాక్ ఇచ్చిన మెగాస్టార్ చిరంజీవి 151వ సినిమా ఏది అంటే.. ఉయ్యాలవాడ నరసింహారెడ్డి అని ఇప్పుడు ఎవరైనా చెప్పేయగలరు. ఈ విషయంపై ఇంకా అధికారిక ప్రకటన రాకపోయినా.. ఇప్పుడిది ఓపెన్ సీక్రెట్ అయిపోయింది. అయితే.. ఆ సీక్రెట్ సంగతేమో కానీ.. ఇప్పుడో సెంటిమెంట్ చిరంజీవి అండ్ టీం ను వెంటాడుతోందట.

ఉయ్యాలవాడ నరసింహారెడ్డి బయోపిక్ అంటే.. 200 ఏళ్ల క్రితం చరిత్రను చూపాలి. అప్పటి బ్రిటిష్ రాజ్యంతో పోరాటాన్ని చూపాలి. దీనిలో భాగంగా గుర్రాలు.. రాజ్యాలు.. కత్తులు.. బరిసెలు.. డబుల్ బ్యారెల్ గన్స్ అన్నీ ఉంటాయి. అన్నీ బాగానే ఉన్నాయ్ కానీ.. గుర్రాల దగ్గరే అసలు సమస్య వస్తోంది. ఒకప్పుడు చిరంజీవి గుర్రం ఎక్కారంటే సినిమా హిట్ అనే సెంటిమెంట్ ఉండేది. కొండవీటి దొంగ.. కొదమసింహం లాంటి సినిమాలు ఈ సెంటిమెంట్ కు కారణం. కానీ కొన్నేళ్లుగా ఈ గుర్రాలు అచ్చి రావడం లేదు.

ఎంతో కష్టపడ్డ అంజి మూవీ ఫ్లాప్.. రీసెంట్ గా బ్రూస్ లీలో కూడా గుర్రం కలిసిరాలేదు. అసలు గుర్రాల చుట్టూనే తిరిగే అబు-బాగ్దాద్ గజదొంగ ఏమైందో తెలీదు. అసలే భక్తి.. సెంటిమెంట్స్ విషయంలో బాగా కేర్ తీసుకునే చిరంజీవి.. ఇప్పుడు గుర్రాలకు శాంతి పూజలు చేయించనున్నారట. అది కూడా రామ్ చరణ్ కు చెందిన ఫామ్ హౌస్ లోని గుర్రాలకే కావడం విశేషం.