పేరుపేరునా కృతజ్ఞతలు అంటున్న ప్యారిస్ ప్యారిస్ బ్యూటీ!

టాలీవుడ్ చందమామ కాజల్ అగర్వాల్ మొన్న జూన్ 19 వ తారీఖున తన పుట్టినరోజు జరుపుకుంది. దీంతో అభిమానుల నుండి కుటుంబ సభ్యులు.. ఇండస్ట్రీ ఫ్రెండ్స్ నుండి జన్మదిన శుభాకాంక్షలు వెల్లువెత్తాయి. తన ఫోన్ ఆగకుండా మోగుతూనే ఉందట.. మెసేజులు కూడా టింగు టింగుమంటూ వస్తూనే ఉన్నాయట. ఇక సోషల్ మీడియా ప్లాట్ ఫామ్స్ అయిన ఫేస్ బుక్.. ట్విట్టర్.. ఇన్స్టాగ్రామ్ ల మెసేజులు.. విషెస్ కు లెక్కే లేదు. దీంతో ఫుల్ ఖుష్ అయిన కాజల్ తన ఇన్స్టా ఖాతా ద్వారా అందరికీ కృతజ్ఞతలు తెలిపింది.

"ప్రపంచవ్యాప్తంగా ఉన్న నా అద్భుతమైన ఫ్యామిలీకి.. స్నేహితులకు.. నాకు ప్రేమతో జన్మదిన శుభాకాంక్షలు తెలిపిన మీ ప్రతి ఒక్కరికీ పేరు పేరునా కృతజ్ఞతలు తెలుపుకుంటున్నాను. ఈ సంవత్సరం కూడా మీకందరికీ బాగుండాలనేది నా ఆకాంక్ష. నేను ఎన్ని సందేశాలు చదవగలనో దాదాపుగా అన్నిటిని చదివాను. ఇంతమంది ప్రేమను పొందుతున్నందుకు నేను చాలా అదృష్టవంతురాలిని అనిపించింది. మీ అందరికీ మనస్ఫూర్తిగా కృతజ్ఞతలు తెలుపుకుంటున్నాను" అంటూ తనకు వచ్చిన లక్షలాది బర్త్ డే విషెస్ పై ఇన్స్టా ఖాతా ద్వారా స్పందించింది.

కాజల్ పుట్టిన రోజు సందర్భంగా కాజల్ కు సంబంధించిన కొన్ని ఫోటోలు హల్చల్ చేస్తున్నాయి. కొన్ని ఫోటోలలో తన ముద్దుల చెల్లి నిషా అగర్వాల్ తో కలిసి పోజిచ్చింది. ఇక కాజల్ సినిమాల విషయానికి వస్తే తెలుగులో శర్వానంద్ ఫిలిం 'రణరంగం' లో హీరోయిన్ గా నటిస్తోంది. తమిళంలో బాలీవుడ్ 'క్వీన్' రీమేక్ 'ప్యారిస్ ప్యారిస్' లోనూ.. 'కోమలి' అనే చిత్రాలలోనూ నటిస్తోంది. ఈ సినిమాలతో పాటుగా శంకర్ - కమల్ హాసన్ సినిమా 'ఇండియన్ 2' లో కూడా కాజల్ హీరోయిన్.