స్టార్ డైరెక్టర్ ఇంకెన్నాళ్ళు ఖాళీగా ఉండాలో..?

'గబ్బర్ సింగ్' చిత్రంతో టాలీవుడ్ స్టార్ డైరెక్టర్ల లిస్టులో చేరాడు హరీశ్ శంకర్. చాలా కాలంగా సరైన సక్సెస్ కోసం ఎదురు చూస్తున్న పవర్ స్టార్ పవన్ కళ్యాణ్ తో కలిసి భారీ విజయాన్ని అందుకున్నాడు. దీంతో దర్శక హీరోల కాంబోలో మరో సినిమా చేయాలని అభిమానులు కోరుకున్నారు. ఈ నేపథ్యంలో వీరి కలయికలో "భవదీయుడు భగత్ సింగ్" అనే చిత్రాన్ని అధికారికంగా ప్రకటించారు.

పవన్ కళ్యాణ్ మరియు హరీశ్ శంకర్ కాంబినషన్ లో సినిమా అనగానే అందరిలోనూ మంచి అంచనాలు నెలకొన్నాయి. అయితే ఈ క్రేజీ ప్రాజెక్ట్ ప్రకటనకే పరిమితమైంది. రెండేళ్లు దాటిపోయినా ఇంతవరకు సెట్స్ పైకి వెళ్ళలేదు. 'భవదీయుడు భగత్ సింగ్' మూవీని అనౌన్స్ చేసిన తర్వాత.. పవన్ భీమ్లా నాయక్ ను పూర్తి చేశాడు. ఇప్పుడు క్రిష్ దర్శకత్వంలో హరి హర వీరమల్లు చిత్రాన్ని కంప్లీట్ చేసే పనిలో ఉన్నాడు.

అయితే 2024 సార్వత్రిక ఎన్నికలు దగ్గర పడుతుండటంతో.. పవన్ కళ్యాణ్ మరో సినిమా చేయడం కష్టమే అనే అభిప్రాయాలు వ్యక్తం అవుతున్నాయి. 2019 తర్వాత మరో చిత్రం చేయకుండా ఎదురు చూస్తున్న హరీశ్ శంకర్ కు నిరాశ తప్పదనే రూమర్స్ చక్కర్లు కొడుతున్నాయి.

ఈ నేపథ్యంలో హరీశ్ శంకర్ కొన్ని రోజుల క్రితం ముంబైకి వెళ్ళాడని తెలుస్తోంది. బాలీవుడ్ సూపర్ స్టార్ సల్మాన్ ఖాన్ తో సినిమా చేయడానికి తీవ్రంగా ప్రయత్నిస్తున్నాడని నివేదికలు పేర్కొన్నాయి. ఇప్పటికే సల్మాన్ కు భారీ మొత్తంలో అడ్వాన్స్ ఇచ్చిన మైత్రీ మూవీ మేకర్స్.. హరీశ్ తో ప్రాజెక్ట్ సెట్ చేయటానికి మీటింగ్ ఏర్పాటు చేసినట్లుగా వార్తలు వచ్చాయి.

ఇటీవల దర్శకుడు కథ వినిపించాడని.. పూర్తి స్క్రిప్టును మెయిల్ చేయమని సల్మాన్ కోరినట్లు పుకార్లు వచ్చాయి. అయితే దాదాపు వారం రోజుల క్రితమే హరీష్ శంకర్ మెయిల్ చేసినప్పటికీ.. కండల వీరుడి టీమ్ నుంచి ఎలాంటి రెస్పాన్స్ రాలేదనే గుసగుసలు వినిపిస్తున్నాయి.

హరీశ్ శంకర్ నిజంగానే సల్మాన్ కు స్టోరీ నెరేట్ చేశాడా? దాన్ని అగ్ర హీరో రిజెక్ట్ చేశాడా? అనేది తెలియదు కానీ.. అభిమానులు మాత్రం దర్శకుడి నెక్స్ట్ మూవీ కోసం ఆసక్తిగా ఎదురుచూస్తున్నారు. మాస్ పల్స్ తెలిసిన డైరెక్టర్ ఇలా చాలా కాలంగా ఎలాంటి సినిమా చేయకుండా ఖాళీగా ఉండటం సరి కాదని కామెంట్స్ చేస్తున్నారు.

మరోవైపు 'భవదీయుడు భగత్ సింగ్' సినిమా ఉందా లేదా అనే దానిపై క్లారిటీ ఇవ్వాలని పవన్ కళ్యాణ్ అభిమానులు అంటున్నారు. ఒకవేళ ఈ ప్రాజెక్ట్ ని ప్రస్తుతానికి పక్కన పెడితే మాత్రం.. మరో హీరోగా వీలైనంత త్వరగా మూవీ చేయాలని హరీశ్ శంకర్ ఫ్యాన్స్ కోరుతున్నారు. మరి డీజే దర్శకుడు త్వరలోనే తన నెక్స్ట్ ప్రాజెక్ట్ పై స్పష్టత ఇస్తారేమో చూడాలి.

కాగా, హరీశ్ శంకర్ 'గడ్డలకొండ గణేష్' తర్వాత మరో చిత్రం చేయలేదు. భవదీయుడు భగత్ సింగ్ సినిమాని అనౌన్స్ చేసిన కొంత కాలానికి తన కథతో సునీల్ హీరోగా ఓ చిత్రం చేయనున్నట్లు ప్రకటించారు. అయితే ఆ తరవాత ఈ ప్రాజెక్ట్ గురించి ఎలాంటి అప్డేట్ లేదు. ఒక ATM అనే వెబ్ సిరీస్ తో ఓటీటీలో ఎంట్రీ ఇస్తున్నట్లు ఆ మధ్య వెల్లడించారు. దీనికి హరీశ్ కథ అందించడమే కాదు.. సమర్పకుడిగా వ్యవహరిస్తున్నారు.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.