హృతిక్‌ ను అంతగా ఏడిపించాలా?

పాపం హృతిక్ రోషన్.. ఆల్రెడీ అతడి కెరీర్ ఇబ్బందికరంగా సాగుతోంది. అందులోనూ అతడి చివరి సినిమా ‘మొహెంజదారో’కు దారుణమైన రిజల్ట్ వచ్చింది. ప్రస్తుతం అతను ఎట్టి పరిస్థితుల్లోనూ ఒక సూపర్ హిట్ ఇవ్వాల్సిన స్థితిలో ఉన్నాడు. ఈ నేపథ్యంలో అతడి ఆశలన్నీ ‘కాబిల్’ మీదే ఉన్నాయి. తన సొంత ప్రొడక్షన్లో తెరకెక్కిన ఈ చిత్రం కచ్చితంగా విజయం సాధిస్తుందని భావిస్తున్నాడు హృతిక్. ఈ సినిమా కోసం మాంచి రిలీజ్ డేట్ కూడా చూసుకున్నాడు. వచ్చే ఏడాది గణతంత్ర దినోత్సవ కానుకగా సినిమాను రిలీజ్ చేయడానికి సన్నాహాలు చేసుకున్నాడు. ఐతే సోలో రిలీజ్ అని ఉత్సాహంగా ఉండగా.. అతడికి కింగ్ ఖాన్ షారుఖ్ అడ్డం పడ్డాడు.

ఈ ఏడాదే రిలీజ్ కావాల్సిన షారుఖ్ మూవీ ‘రాయీస్’ వాయిదా పడి.. గణతంత్ర దినోత్సవానికే ఫిక్సయింది. దీనిపై హృతిక్ కక్కలేక మింగలేక ఉన్నాడు. సినిమాను వాయిదా వేద్దామంటే భయపడ్డాడు అంటారు. పోటీకి వెళ్లి రిలీజ్ చేస్తే కలెక్షన్లపై ప్రభావం పడుతుంది. దీంతో చేసేది లేక కనీసం ఓపెనింగ్ డే కలెక్షన్లయినా బాగా తెచ్చుకుందాం అని ఒక రోజు ముందుగా.. అంటే జనవరి 25కు రిలీజ్ డేట్ ప్రకటిస్తే.. షారుఖ్ అక్కడా అడ్డం పడ్డాడు. తన సినిమాను కూడా 25కే రిలీజ్ చేస్తున్నట్లు ప్రకటించాడు. ‘కాబిల్’తో పోలిస్తే ‘రాయీస్’ మీద అంచనాలు భారీగా ఉన్నాయన్న సంగతి కొత్తగా చెప్పాల్సిన పని లేదు. ఈ నేపథ్యంలో ‘కాబిల్’ ఓపెనింగ్స్‌ పై ప్రభావం తప్పదు. అందులోనూ టాక్ ఏమైనా తేడా వస్తే ఇబ్బంది మామూలుగా ఉండదు. ఈ ఏడాది ‘మొహెంజదారో’కు ‘రుస్తుమ్’ నుంచి దెబ్బ తగిలినట్లు.. ‘కాబిల్’కు కూడా ‘రాయీస్’ నుంచి పంచ్ పడుతుందేమో అని హృతిక్ ఫ్యాన్స్ కంగారు పడుతున్నారు. మరి ఏం జరుగుతుందో చూడాలి.