క్రిష్-క్వీన్.. కథ కంచికి చేరుస్తున్నారట

ఓ నెలన్నర రోజులుగా బాలీవుడ్ లో సూపర్ హాట్ టాపిక్ ఏంటంటే.. క్రిష్ హృతిక్ రోషన్ - క్వీన్ కంగనా రనౌత్ ల వ్యవహారమే. తామిద్దరూ స్టార్ స్టేటస్ ఉన్న సెలబ్రిటీలం అనే మాట మర్చిపోయి.. ఇష్టం వచ్చిన రీతిలో ప్రవర్తించారు. కోట్లాది మంది తమను ఫాలో అవుతుంటారనే ఆలోచన లేకుండా.. ఒకరిపై ఒకరు తీవ్ర ఆరోపణలు చేసుకున్నారు.

లీగల్ నోటీసులు - పోలీసు కేసులు - ఆన్ లైన్ లీకులు - వల్గర్ స్టేట్ మెంట్లతో జనాల నోళ్లలో నానారు. బ్రేకప్ వ్యవహారాన్ని సైలెంట్ గా సెటిల్ చేసుకోకుండా నెట్టింటికెక్కి పరువు పోగొట్టుకున్నారు. ఇప్పుడు ఈ వివాదం ఓ కొలిక్కి వచ్చినట్లుగా కనిపిస్తోంది. ఈ అభిప్రాయానికి రావడం కారణం.. కంగనా ఇచ్చిన ఓ స్టేట్ మెంట్. ఈ వివాదంపై ఇకపై ఎటువంటి పబ్లిక్ స్టేట్ మెంట్లు ఇవ్వకూడదని డిసైడ్ అయినట్లు కంగనా తరపు లాయర్ చెప్పుకొచ్చారు.

'మా ఇద్దరికి పరిచయం ఉన్న ఉమ్మడి వ్యక్తులు.. ఈ వివాదంపై చర్చించారు. అందుకే ఈ గొడవను స్నేహపూర్వకంగా సెటిల్ చేసుకోవాలని అనుకుంటున్నాము. ఇకపై ఈ విషయంలో మా వైపు నుంచి ఎటువంటి స్టేట్ మెంట్ ఇవ్వబోము. ఇదే తరహా వాగ్దానం అటువైపు నుంచి కూడా రావడంతోనే ఈ నిర్ణయం తీసుకున్నాం' అంటూ కంగనా రనౌత్ ఓ స్టేట్ మెంట్ ఇచ్చింది. వివాదం ముగించి, కథ కంచికి చేర్చడం కరెక్టే కానీ.. ఈ మాత్రం ఇంగిత జ్ఞానం ముందే ఉంటే బాగుండేది కదా అనుకుంటున్నారు అభిమానులు.