సినిమా కోసం అప్పడాల అమ్మకం

తాము నటించే సినిమాల్లో పాత్రల కోసం వాటికి అనుగుణంగా తమను తాము పూర్తిగా మార్చుకునే స్టార్ హీరోలలో హృతిక్ రోషన్ ఒకడు. గత కొంత కాలంగా సినిమాలు చేయటంలో దూకుడు తగ్గించిన ఈ కండల వీరుడు తన రేంజ్ కు తగ్గ సక్సెస్ కొట్టి చాలా కాలమే అయ్యింది. గత ఏడాది వచ్చిన కాబిల్ లో కళ్ళు కనిపించని వాడిగా హృతిక్ నటన క్రిటిక్స్ ని సైతం మెప్పించినప్పటికి షారుఖ్ ఖాన్ రయీస్ తో పోటీ పడటం వల్ల కమర్షియల్ గా అనుకున్న రేంజ్ కు చేరుకోలేకపోయింది. తాజాగా హృతిక్ రోషన్ చేస్తున్న సినిమా సూపర్ 30. ప్రముఖ గణిత నిపుణుడు, విద్యావేత్త ఆనంద్ కుమార్ జీవిత కథ ఆధారంగా రూపొందుతున్న ఈ మూవీ కోసం హృతిక్ తన ఆహార్యాన్ని పూర్తిగా మార్చుకోవడం ఫోటోలలో చూసి అభిమానులు సైతం షాకయ్యారు.

తాజాగా హృతిక్ ఈ సినిమాలో అప్పడాలు సైకిల్ మీద పెట్టుకుని అమ్ముకుంటూ తిరిగే ఫోటో ఒకటి సోషల్ మీడియాలో బాగా వైరల్ అవుతోంది. ఆనంద్ కుమార్ తన కెరీర్ ప్రారంభంలో ఆర్థికంగా కుటుంబంలో ఇబ్బందులున్న కారణంగా సాయంత్రాలు పార్ట్ టైం లాగా ఇలా అప్పడాలు అమ్ముకుంటూ చేదోడు వాదోడుగా నిలిచేవాడు. సరిగ్గా ఇప్పుడు ఆ సీన్లనే చిత్రీకరిస్తున్నాడు దర్శకుడు వికాస్ భల్.టీవీ నటి మృణాల్ ఠాకూర్ హృతిక్ సరసన తన జీవిత భాగస్వామిగా కనిపిస్తుంది. సూపర్ 30 ఇప్పటి దాకా వచ్చిన బయోపిక్స్ లో ప్రత్యేకంగా నిలుస్తుందంటున్నాడు దర్శకుడు వికాస్. స్పోర్ట్స్ డ్రామా లోనే అధికంగా బాలీవుడ్ సినిమాలు వచ్చాయి. ఈ నేపధ్యంలో ఇది స్పెషల్ గా నిలుస్తుంది అనేది ఆయన నమ్మకం.

నవంబర్ లో విడుదల కానున్న సూపర్ 30 మీద హృతిక్ చాలా ఆశలు పెట్టుకున్నాడు. దీని తర్వాత క్రిష్ 4 రూపొందించేందుకు నాన్న రాకేశ్ రోషన్ ఈపాటికే సన్నాహాలు మొదలుపెట్టేసాడు. క్రిష్ సిరీస్ కి దీంతో ముగింపు పలికే అవకాశాలు ఉన్నాయి. సూపర్ 30 ఈ ఏడాది రానుండగా క్రిష్ 4 మాత్రం 2019 డిసెంబర్ లో విడుదల చేసేలా ప్లాన్ చేస్తున్నారు.