కుర్రాడి కోసం అంత పెట్టిస్తున్నాడా!?

బోయపాటి శ్రీను కొత్త సినిమా షూటింగ్ శరవేగంగా సాగుతోంది. బెల్లంకొండ శ్రీనివాస్ హీరోగా రూపొందుతున్న ఈ మూవీని.. ప్రతిష్టాత్మకంగా తెరకెక్కిస్తున్నాడు దర్శకుడు. ఈ చిత్రం బడ్జెట్ అనూహ్యంగా అంతకంతకూ పెరిగిపోతుండడం.. అందరినీ ఆశ్చర్యపరుస్తోంది.

తాజాగా ఈ మూవీలో కీలకమైన ఎపిసోడ్.. పెళ్లి సీన్.. పాట కోసం భారీ సెట్ ను నిర్మించారట. ఈ ఒక్క సెట్టింగ్ కోసమే ఏకంగా కోటీ 64 లక్షల రూపాయలు ఖర్చయినట్లు తెలుస్తోంది. ప్రతీ ఫ్రేమ్ ను విజువల్ వండర్ గా తీర్చిదిద్దేందుకు బోయపాటి ప్రయత్నిస్తున్నట్లు చెప్పుకుంటున్నారు. బెల్లంకొండ శ్రీనివాస్ మూడో సినిమాగా తెరకెక్కుతున్న ఈ మూవీ కోసం.. ఎక్కడా కాంప్రమైజ్ కావడం లేదట ఈ దర్శకుడు. తాజాగా బెల్లంకొండ కోసం అల్లు అర్జున్ కి రెగ్యులర్ గా వర్క్ చేసే కాస్ట్యూమ్ డిజైనర్.. స్టైలిస్ట్ లను తీసుకొచ్చారు. ఈ మూవీ విషయంలో విజువల్స్ కి బాగా ప్రాధాన్యత ఇస్తున్నాడట దర్శకుడు.

నాగచైతన్యతో సాహసం శ్వాసగా సాగిపో వంటి చిత్రాన్ని తీసిన నిర్మాత మిర్యాల రవీందర్ రెడ్డి నుంచి బోయపాటికి అందుతున్న సపోర్ట్ చూసి అందరూ ఆశ్చర్యపోతున్నారు. ఇప్పటికే రకుల్ ప్రీత్ సింగ్.. ప్రగ్యా జైస్వాల్ లను హీరోయిన్ లుగా తీసుకున్నారు. శృతి హాసన్ ఐటెం సాంగ్ చేసే అవకాశం ఉందంటున్నారు. మరోవైపు మాజీ హీరోయిన్ వాణీ విశ్వనాథ్ కు ఈ సినిమా కంబ్యాక్ మూవీ కానుంది. అయితే.. సరైనోడు బ్లాక్ బస్టర్ తర్వాత బోయపాటి తీస్తున్న సినిమా కావడంతో.. నిర్మాత ఫుల్ కాన్ఫిడెంట్ గా ఉన్నాడట.


Like Us on Facebook : https://www.facebook.com/Tupakidotcom/