చైతూ సినిమాకు పిచ్చ క్రేజ్

నాగచైతన్య కెరీర్ ఆరంభం నుంచి పడి లేస్తూ సాగుతున్నాడు. ఐతే లవ్ స్టోరీస్ - సెన్సిబుల్ మూవీస్ చేసిన ప్రతిసారీ అతడికి మంచి ఫలితమే వస్తోంది. ఏమాయ చేసావె - 100 పర్సంట్ లవ్ - మనం - ఒక లైలా కోసం లాంటి సినిమాలు చైతూకి మంచి గుర్తింపు తెచ్చిపెట్టాయి. ఇప్పుడు గౌతమ్ మీనన్ దర్శకత్వంలో చేస్తున్న ‘సాహసం శ్వాసగా సాగిపో’ మీద మంచి హోప్స్ తో ఉన్నాడు చైతూ. దీని తర్వాత ఈ అక్కినేని కథానాయకుడు చేయబోయే ‘మజ్ను’ అతడి కెరీర్‌ కు బిగ్ టర్నింగ్ పాయింట్ అయ్యే అవకాశాలు కనిపిస్తున్నాయి.

ఈ సినిమాకు సెట్ చేస్తున్న కాంబినేషన్ అలాంటిది. ‘కార్తికేయ’ లాంటి బ్లాక్ బస్టర్‌ తో అరంగేట్రం చేసిన చందూ మొండేటి దర్శకుడు కాబట్టి ఆటోమేటిగ్గా సినిమా మీద ఆసక్తి పెరుగుతుంది. మరోవైపు శ్రుతి హాసన్ లాంటి టాప్ హీరోయిన్ని చైతూకు జోడీగా తీసుకున్నారు. మలయాళ ఫ్రెష్ టాలెంట్ అనుమప పరమేశ్వరన్ మరో హీరోయిన్ గా చేయబోతోంది. మరోవైపు ఇందులో నాగార్జున - వెంకటేష్ గెస్ట్ రోల్స్ చేస్తారట. తాజా కబురేంటంటే.. చైతూ ఫ్రెండ్ నితిన్ కూడా ఇందులో ఓ కీలక పాత్ర చేయడానికి అంగీకరించాడట. అతను ఈ సినిమా నిర్మాణంలోనూ పాలుపంచుకునే అవకాశాలు కూడా ఉన్నాయట.

చైతూకు మామూలుగానే లవ్ స్టోరీస్ విషయంలో మంచి ట్రాక్ రికార్డుండటం.. మలయాళ బ్లాక్ బస్టర్ ప్రేమకథ ‘ప్రేమమ్’కు ఈ సినిమా రీమేక్ కావడంతో ‘మజ్ను’ సినిమా మొదలవకముందే హైప్ తెచ్చుకుంది. ఇప్పటికే ఈ సినిమాకు మార్కెట్ వర్గాల్లోనూ మంచి క్రేజ్ వచ్చిందట. ఓవర్సీస్ రైట్స్ ఆల్రెడీ మంచి ప్రైజ్ కి బేరం అయిపోయినట్లు చెబుతున్నారు. ఇక సినిమా మొదలై.. ఫస్ట్ లుక్ పోస్టర్ - టీజర్ అవీ వచ్చాయంటే ఆటోమేటిగ్గా సినిమాకు మంచి బిజినెస్ జరిగే అవకాశాలున్నాయి. మొత్తానికి ‘మజ్ను’ కచ్చితంగా చైతూ కెరీర్ లో పెద్ద టర్నింగ్ పాయింట్ అయ్యేలాగే ఉంది.