2.0 కోసం స్టార్ల మహా కలయిక

భారతదేశంలోనే అత్యంత భారీ బడ్జెట్ సినిమాగా చెప్పబడుతున్న 2.0 ప్రమోషన్ ఇండియాలో ఇంతవరకు మొదలు పెట్టనే లేదు. ఏప్రిల్ లో విడుదల తేది గురించి ఇంకా క్లారిటీ కూడా ఇవ్వలేదు. దీని మీదే ఆధారపడి పలు తెలుగు, తమిళ సినిమాల విడుదల తేదీలు ఆధారపడి ఉన్నాయి. శంకర్ మాత్రం అప్పుడు ఇప్పుడు అంటున్నాడు కాని డేట్ విషయం మాత్రం ఎటూ తేల్చడం లేదు. రజనికాంత్ కెరీర్ లో ఇంత ఆలస్యం అయిన సినిమా ఇదే అంటున్నారు. తలైవా ఫాన్స్ కు గుడ్ న్యూస్ ఏంటంటే దీని టీజర్ విడుదలకు ఏర్పాట్లు జరుగుతున్నాయి. ఈ వేడుకను సినిమా ఫంక్షన్లను తలదన్నే రీతిలో హైదరాబాద్ తో పాటు చెన్నైలో కూడా నిర్వహించే ప్లాన్ లో ఉన్నారు. దుబాయ్ లో జరిగిన ఫస్ట్ లుక్, ఆడియో లాంచ్ కే పది కోట్ల దాకా ఖర్చు పెట్టారు అనే టాక్ ఇప్పటికీ హాట్ హాట్ గానే ఉంది. ఇక్కడ కూడా దానికి ఏ మాత్రం తీసిపోని రీతిలో చేయబోతున్నారు అని టాక్.

విశేషం ఏంటంటే ఈ టీజర్ రిలీజ్ కోసం సౌత్ ఇండియన్ సూపర్ స్టార్స్ తో పాటు బిగ్ బి అమితాబ్ బచ్చన్ కూడా జాయిన్ కాబోతున్నారు. తెలుగు నుంచి చిరంజీవి - తమిళ్ నుంచి కమల్ హాసన్ - మలయాళం నుంచి మమ్ముట్టి-మోహన్ లాల్ ప్రత్యేక అతిధులుగా రాబోతున్నారు. కన్నడ నుంచి శివ రాజ్ కుమార్ ని పిలిచే అవకాశాలు ఉన్నాయి. వీళ్ళంతా వయసు పరంగా సినిమాల కౌంట్ పరంగా అన్నింటిలోను రజనికి సమకాలికులు. అందుకే అంగరంగ వైభవంగా జరిగే ఆ వేడుకకు వీళ్ళు వస్తేనే బాగుంటుంది అని శంకర్ భావించినట్టు టాక్. ఫిబ్రవరి రెండో వారం ఈ ఈవెంట్ జరిగే అవకాశాలు ఉన్నాయి.

అది మొదలు 2.0 ప్రమోషన్ వేగాన్ని పెంచబోతున్నారు. టీజర్ రిలీజ్ రోజునే విడుదల తేది ప్రకటించే ఛాన్స్ ఉంది. ఏప్రిల్ 13 లేదా ఏప్రిల్ 27 అనే దాని గురించి సస్పెన్స్ ఇంకా కొనసాగుతోంది. దీని కంటే కాలానే ముందు వస్తుంది అనే వార్తలు కూడా ఈ మధ్య షికారు చేసాయి. అక్షయ్ కుమార్ విలన్ గా నటిస్తుండగా హీరొయిన్ అమీ జాక్సన్ కూడా ఇందులో రోబో పాత్రనే పోషిస్తున్నట్టు వినికిడి.