పాత బాకీ తీర్చేందుకు జూనియర్ ఫైట్

యంగ్ టైగర్ ఎన్టీఆర్, కొరటాల శివ కాంబినేషన్ లో తెరకెక్కుతున్న జనతా గ్యారేజ్.. ఇప్పుడు ముంబైలో షూటింగ్ జరుపుకుంటోంది. రీసెంట్ గా యూనిట్ తో జత కలిసిన ఎన్టీఆర్.. ఇప్పుడో ఫైట్ సీన్ కి రెడీ అయిపోతున్నాడు. సినిమాలో కీలకమైన సన్నివేశంలో వచ్చే ఈ ఫైట్ ని.. చాలా గ్రాండ్ గా తెరకెక్కించేందుకు సర్వం సిద్ధం చేసుకున్నాడు దర్శకుడు కొరటాల. ఎన్టీఆర్ కెరీర్ లో బిగ్గెస్ట్ ఫైట్స్ లో ఇదొకటిగా నిలపాలని అనుకుంటున్నాడట.

జూనియర్ సినిమాల్లో ఫైట్స్ అంటే.. సింహాద్రి ఇంటర్వెల్ బ్యాంగ్, ఊసరవెల్లిలో ఇంటర్వెల్ బ్యాంగ్ తప్పకుండా గుర్తొస్తాయి. వీటిని మించిపోయేలా జనతా గ్యారేజ్ లో ఫైట్స్ ఉంటాయంటున్నారు. అంతే కాదు.. రీసెంట్ గా బ్లాక్ బస్టర్ అయిన ఎన్టీఆర్ మూవీ నాన్నకు ప్రేమతో చిత్రంలో.. భారీ ఫైట్స్ ఉండవు. దీంతో మాస్ ఫ్యాన్స్ బాగా డిజప్పాయింట్ అయ్యారు. ఈ బాకీ కూడా తీర్చేసుకోవాలని ఎన్టీఆర్ అనుకుంటున్నాడని తెలుస్తోంది.

ముంబైలోని బాంద్రాలో చిత్రీకరించే ఈ భారీ ఫైట్ సీక్వెన్స్ ని.. ఫైట్ మాస్టర్ అణల్ అరసు సమకూరుస్తున్నాడు. భారీగానే కాకుండా.. స్టైలిష్ గా కూడా ఈ ఫైట్ ఉండనుందని తెలుస్తోంది. ఈ నెల 15 నుంచి ఈ సీక్వెన్స్ షూటింగ్ ప్రారంభం కానుంది.