ఒక్క రోజులో పవన్ సినిమా రేంజే మారింది

స్టార్ హీరోల సినిమాలు సెట్స్ మీదికి వెళ్లాక.. అప్పుడప్పుడూ ఏదో ఒక విశేషం పంచుకుంటుండాలి. లేకుంటే హైప్ క్రియేటవ్వదు. ఐతే పవర్ స్టార్ పవన్ కళ్యాణ్ కొత్త సినిమా మొదలై ఆరు నెలలు దాటినా మొన్నటి దాకా ఈ చిత్రానికి సంబంధించి ఏ విశేషమూ పంచుకోలేదు. దీంతో పవన్ అభిమానుల్లో బాగా ఫ్రస్టేట్ అయిపోయారు. ఓవైపు పవన్ సినిమాతో పాటే మొదలైన ‘జై లవకుశ’ విషయంలో ఎప్పటికప్పుడు అప్ డేట్స్ ఇస్తూ.. పోస్టర్లు.. టీజర్లు రిలీజ్ చేస్తూ ఆ చిత్రానికి మంచి హైప్ తీసుకొచ్చారు. దాదాపుగా ఇదే టైంలో లాంచ్ అయిన మరో పెద్ద సినిమా ‘పైసా వసూల్’ కూడా ఎప్పుడూ వార్తల్లో ఉంటూ వచ్చింది. ఈ సినిమా ఇప్పటికే విడుదలైపోయింది కూడా.

ఐతే పవన్ సినిమాకు సంబంధించి మాత్రం ఏ అప్ డేట్స్ లేకపోవడంతో అనుకున్నంత హైప్ క్రియేటవ్వలేదు. కానీ మొన్న పవన్ పుట్టిన రోజు సందర్భంగా బయటికొచ్చిన విశేషాలతో మొత్తం సీన్ మారిపోయింది. ఈ చిత్ర కాన్సెప్ట్ పోస్టర్లో కాన్సెప్ట్ ఏంటన్నది క్లారిటీ రాకపోయినా.. దాని గురించి పెద్ద చర్చే నడిచింది. ఈ పోస్టర్ కాన్సెప్ట్ ఏమై ఉండొచ్చన్న విషయంలో సోషల్ మీడియాలో పెద్ద డిస్కషన్ సాగింది. ఇక తెల్లవారుజామున సంగీత దర్శకుడు అనిరుధ్ రిలీజ్ చేసిన ‘బైటికెళ్తే..’ పాట కూడా హాట్ టాపిక్ అయింది. ముందు మామూలుగా అనిపించినప్పటికీ.. వినగా వినగా ఈ పాట బాగా ఎక్కేసిన ఈ పాట రిపీట్ మోడ్లో వెళ్తోందిప్పుడు. ఈ పాట చివర్లోని పవన్ షాడో షాట్ కూడా అభిమానులకు మంచి కిక్కిచ్చింది. మరోవైపు పవన్-కీర్తిల స్టిల్ కూడా చర్చనీయాంశంగా మారింది. ఆ స్టిల్ ప్లెజెంట్ ఫీలింగ్ ఇచ్చింది. మొత్తంగా ఒక్క రోజు వ్యవధిలో బయటికొచ్చిన పవన్ కొత్త సినిమా విశేషాలన్నీ ఈ సినిమాకు మంచి హైప్ తీసుకొచ్చి.. అంచనాలు పెంచేశాయి.