'కేజీయఫ్ 2' కు భారీ ఓటీటీ ఆఫర్..?

కన్నడ రాకింగ్ స్టార్ యష్ - డైరెక్టర్ ప్రశాంత్ నీల్ కాంబోలో రూపొందుతున్న బిగ్గెస్ట్ యాక్షన్ ఎంటర్టైనర్ ''కేజీయఫ్: చాప్టర్ 2''. పాన్ ఇండియా స్థాయిలో బ్లాక్ బస్టర్ సాధించిన 'కేజీయఫ్ 1' చిత్రానికి కొనసాగింపుగా ఈ సినిమా రూపొందుతోంది. చాప్టర్-1 భారీ విజయం నమోదు చేయడంతో పార్ట్-2 పై సినీ అభిమానులు భారీ అంచనాలు పెట్టుకున్నారు. ఇప్పటికే విడుదలైన ప్రచార చిత్రాలు - టీజర్ ఈ సినిమా ఏ రేంజ్ లో ఉండబోతుందో హింట్ ఇచ్చారు. ఈ నేపథ్యంలో 'కేజీయఫ్ 2' నాన్ థియేట్రికల్ రైట్స్ భారీ ధర పలుకుతున్నట్లు తెలుస్తోంది.

అయితే లేటెస్టుగా ప్రముఖ ఓటీటీ సంస్థ 'కేజీయఫ్ 2' డిజిటల్ రైట్స్ కోసం భారీ ఆఫర్ తో వచ్చిందట. థియేట్రికల్ రిలీజ్ స్కిప్ చేసి డైరెక్ట్ ఓటీటీ రిలీజ్ కు ఇస్తే 'ఆర్. ఆర్.ఆర్' కంటే ఎక్కువ మొత్తాన్ని ఇవ్వనున్నట్లు ఆశ చూపిందట. అయితే మేకర్స్ మాత్రం ఈ డీల్ కు ఒప్పుకోలేదని తెలుస్తోంది. ఫస్ట్ పార్ట్ సాధించిన విజయాన్ని దృష్టిలో పెట్టుకొని థియేటర్లలోనే ఈ పాన్ ఇండియా చిత్రాన్ని విడుదల చేయాలని వారు నిర్ణయించుకున్నారు. హీరో యష్ సైతం ఎన్ని రోజులు లేట్ అయినా బిగ్ స్క్రీన్ మీదకే వస్తామని ఆ మధ్య ప్రకటించారు.

ఇప్పటికే షూటింగ్ పూర్తి చేసుకున్న 'కేజీయఫ్: చాప్టర్ 2' సినిమా విడుదల తేదీపై త్వరలోనే క్లారిటీ రానుంది. ప్రస్తుతానికి సౌత్ లో మాత్రమే థియేటర్లలో సినిమాలను రిలీజ్ చేస్తుండగా.. నార్త్ లో ఇంకా పరిస్థితులు సానుకూలంగా మారలేదు. నేషనల్ వైడ్ రిలీజ్ చేయాల్సిన సినిమా కావడంతో.. అనువైన విడుదల తేదీ గురించి మేకర్స్ ఆలోచిస్తున్నట్లు తెలుస్తోంది. నిజానికి కరోనా సెకండ్ వేవ్ ప్రభావం పడకపోయుంటే జులై 16న 'కేజీయఫ్' సీక్వెల్ ప్రేక్షకుల ముందుకు వచ్చేది. మరి ఇప్పుడు కన్నడ బాహుబలి ని ఏ సీజన్ లో థియేటర్లలోకి తీసుకోస్తారో చూడాలి.

కాగా, 'కేజీఎఫ్ 2' చిత్రంలో యష్ సరసన శ్రీనిధి శెట్టి హీరోయిన్ గా నటిస్తోంది. బాలీవుడ్ స్టార్స్ సంజయ్‌ దత్‌ - రవీనా టాండన్ లతో పాటుగా ప్రకాష్ రాజ్ - రావు రమేష్ - ఈశ్వరీ రావు తదితరులు ప్రధాన పాత్రలు పోషించారు. రవి బస్రుర్ ఈ చిత్రానికి సంగీతం సమకూర్చారు. హోంబలే ఫిలింస్ బ్యానర్ పై విజయ్‌ కిరగందూర్‌ ఈ చిత్రాన్ని భారీ బడ్జెట్ తో నిర్మిస్తున్నారు.