ఫోకస్‌ అంతా సాయి పల్లవిపైనే..!

తెలుగు ప్రేక్షకులకు ‘ఫిదా’ చిత్రంతో పరిచయం అయ్యి ఫిదా చేసిన ముద్దుగుమ్మ సాయి పల్లవి ఆ తర్వాత ఎంసీఏ - కణం వంటి చిత్రాలను చేసింది . ఆ సినిమా సక్సెస్‌ అయ్యి, మంచి ఆఫర్లు వచ్చినా కూడా కథల విషయంలో పేచీలు పెట్టి పలు ఆఫర్లను కాదన్నది అంటూ వార్తలు వచ్చాయి. హను రాఘవపూడి చెప్పిన కథకు ఇంప్రెస్‌ అయిన సాయి పల్లవి తాజాగా శర్వానంద్‌ తో కలిసి ‘పడి పడి లేచె మనసు’ చిత్రంలో నటించింది. ఆ సినిమా మరో రెండు రోజుల్లో ప్రేక్షకుల ముందుకు రాబోతుంది.

ఆ సినిమా హీరో మరియు దర్శకుడు వరుసగా ఫ్లాప్‌ లను ఎదుర్కొంటూ వస్తున్నారు. అయితే ఈ చిత్రంలో సాయి పల్లవి ఉండటం వల్ల అంచనాలు భారీగా ఉన్నాయి. సాయి పల్లవి నటించిన ప్రతి సినిమా కూడా బాక్సాఫీస్‌ వద్ద సందడి చేస్తూ వస్తుంది. దాంతో ఈ సినిమా కూడా తప్పకుండా ఆకట్టుకుంటుందనే నమ్మకంను వ్యక్తం చేస్తున్నారు. అందుకే సాయి పల్లవిని ప్రమోషన్స్‌ లో ఎక్కువగా ఫోకస్‌ చేస్తున్నారు. సాయి పల్లవిని హీరో శర్వానంద్‌ తో సమానంగా మీడియా ముందు ఉంచి ప్రమోషన్స్‌ చేస్తున్నారు.

ఇటీవల జరిగిన ప్రీ రిలీజ్‌ వేడుకలో కూడా సాయి పల్లవి గురించి అల్లు అర్జున్‌ మరియు శర్వానంద్‌ లు తెగ పొగడ్తలు కురిపించారు. ఆమె ఆహా, ఓహో అంటూ శర్వానంద్‌ కామెంట్‌ చేశాడు. మొత్తంగా సాయి పల్లవి పైనే పడి పడి లేచె మనసు మూవీ భారం ఉంది. ఆమెపై నమ్మకంతో ప్రేక్షకులు థియేటర్లకు భారీగా రావడం ఖాయం, మంచి ఓపెనింగ్స్‌ ను దక్కించుకోవడం ఖాయం అంటూ ట్రేడ్‌ నిపుణులు కూడా అంటున్నారు.