భారమంతా భానుమతిమీదేనా!

ఫిదా విడుదలై ఏడాదిన్నర అవుతున్నా టీవీలో వచ్చిన ప్రతిసారి భానుమతిగా హీరోయిన్ సాయి పల్లవి మేజిక్ స్పెషల్ గా మెప్పిస్తునే ఉంటుంది. దాని తర్వాత న్యాచురల్ స్టార్ నానితో ఎంసిఎ తప్ప ఇంకే స్ట్రెయిట్ మూవీ చేయలేదు సాయి పల్లవి. అది వచ్చి ఏడాది దాటేసింది. తాజాగా తన కొత్త సినిమా పడి పడి లేచే మనసు కోసం ఎదురు చూస్తున్నారు అభిమానులు. కోల్కతా నేపాల్ లాంటి ఖరీదైన లొకేషన్స్ లో షూటింగ్ జరుపుకున్న ఈ మూవీ శర్వానంద్ ఇమేజ్ కన్నా ఎక్కువగా సాయి పల్లవి బ్రాండ్ మీద మార్కెట్ అవుతోందని ట్రేడ్ టాక్. నిర్మాతలు సైతం ఆ నమ్మకంతోనే బడ్జెట్ కాస్త ఎక్కువైనా వెనుకాడలేదని తెలిసింది.

ఇప్పటికే టీజర్ ఆడియో ట్రాక్స్ ప్రేక్షకులతో పాటు యూత్ లో మంచి రెస్పాన్స్ తెచ్చుకున్నాయి. కానీ అవొక్కటే భారీ ఓపెనింగ్స్ రావడానికి సరిపోవు కాబట్టి ప్రమోషన్ పరంగా ఇంకొంచెం కొత్తగా ప్లానింగ్ జరుగుతున్నట్టు సమాచారం. పైగా పడి పడి లేచే మనసు సోలోగా రావడం లేదు. విపరీతమైన పోటీ మధ్య ఉంది. వరుణ్ తేజ్ అంతరిక్షంతో పాటు అసలు పరిచయమే లేని కన్నడ హీరో యష్ కెజిఎఫ్ కూడా ఊహించని హైప్ తెచ్చుకుంది. వీటితో పాటు ఏ సెంటర్స్ లో షారుఖ్ ఖాన్ జీరో కూడా టఫ్ కాంపిటీషన్ ఇస్తుంది.

సో పడి పడి లేచే మనసు లో కంటెంట్ బాగున్నా అది ఉందనే మెసేజ్ పబ్లిక్ లోకి బలంగా తీసుకెళ్లగలగాలి. అయితే సాయి పల్లవి మీద భారం అని కాదు కానీ ఇది మిస్ కాకూడని లవ్ స్టోరీ అని ఫీలింగ్ కలిగించేలా ట్రైలర్ యాడ్స్ ని సిద్ధం చేస్తున్నట్టు తెలిసింది. మరో ట్విస్ట్ ఏంటంటే సాయి పల్లవి మరో సినిమా మారి 2 తెలుగు వెర్షన్ కూడా అదే డేట్ కే ఫిక్స్ అయ్యింది. అందుకే మనసు లేచి కాస్త వేగంగా పరిగెత్తాలి.