దుర్మార్గంగా ఉండే సీత జనాలకు నచ్చిందే!

బెల్లంకొండ శ్రీనివాస్.. కాజల్ అగర్వాల్ జంటగా నటించిన చిత్రం 'సీత'. సీనియర్ దర్శకుడు తేజ తెరకెక్కించిన ఈ చిత్రానికి సంబంధించిన ప్రోమోస్ మొదటి నుంచి ప్రేక్షకుల్లో సినిమా పట్ల ఇంట్రెస్ట్ పెంచుతూనే ఉన్నాయి. సీత పేరున్న హీరోయిన్ ప్రవర్తనలో మాత్రం దుర్మార్గురాలిగా ఉండడం.. పేరుకు రాముడు అయినా(రామాయణంలో రాముడు అంటే జస్ట్ మంచి బాలుడు మాత్రమే కాదు.. చాలా తెలివైన వాడు) ముద్దపప్పులా పప్పుసుద్ధలా ఉండడం.. వీరికి తోడు రావణాసురుడికి ప్రతిరూపంగా సోనూ సూద్.. ఈ మోడరన్ అడాప్టేషన్ ప్రేక్షకులు కనెక్ట్ అయింది. అందుకే ఈ సినిమా ప్రోమోలకు యూట్యూబ్ లో భారీ రెస్పాన్స్ వస్తోంది.

'సీత' ట్రైలర్ మే 9 న రిలీజ్ అయిన సంగతి తెలిసిందే. మొదట రిలీజ్ ఆయిన ప్రోమోలకు మించి అన్నట్టుగా ఈ ట్రైలర్ ఉండడంతో సోషల్ మీడియాలో భారీ వ్యూస్ తో దూసుకుపోతోంది. ఇప్పటివరకూ ఈ ట్రైలర్ కు ఎకే ఎంటర్టైన్మెంట్స్ వారి అధికారిక ఛానెల్ లోనే 2. 4 మిలియన్ వ్యూస్ వచ్చాయి. స్టార్ హీరోల సినిమాలకు ఈ వ్యూస్ తక్కువ నంబర్ కావచ్చు కానీ యువ హీరో అయిన బెల్లంకొండ శ్రీనివాస్ కు మాత్రం ఇది భారీ రెస్పాన్స్ కిందే లెక్క. అంతే కాదు ఈ ట్రైలర్ ఇప్పుడు యూట్యూబ్ లో నెంబర్ వన్ స్థానంలో ట్రెండింగ్ అవుతోంది.

ట్రైలర్ మాత్రమే కాదు. ఈ సినిమా టీజర్ కు.. బుల్ రెడ్డి పాటకు కూడా అద్భుత స్పందన దక్కింది. ఈ రెస్పాన్స్ చూస్తుంటే ఈ సారి దర్శకుడు తేజకు.. బెల్లంకొండ బాబుకు మంచి హిట్ తగలడం ఖాయమేమో అనిపిస్తోంది.