రిలీజ్ ముందు ఎన్నిక‌ల కోడ్.. ఏంటీ ట్విస్ట్ వ‌కీల్ సాబ్?

ప‌వ‌ర్ స్టార్ ప‌వ‌న్ క‌ల్యాణ్ న‌టించిన వ‌కీల్ సాబ్ ఏప్రిల్ 9న ప్ర‌పంచ‌వ్యాప్తంగా విడుద‌ల‌‌వుతున్న సంగ‌తి తెలిసిందే. స‌రిగ్గా ఈ సినిమా రిలీజ్ ముందు ఆంధ్ర‌ప్ర‌దేశ్ లో ఎన్నిక‌ల నోటిఫికేష‌న్ ప్ర‌క‌ట‌న.. కోడ్ అమ‌లుపై ప్ర‌ధానంగా చ‌ర్చ‌కు వ‌చ్చింది.

ప‌వ‌న్ క‌ల్యాణ్‌ జ‌న‌సేన పార్టీని ప్రారంభించి రాజ‌కీయాల్లోకి వెళ్లాక సినిమాల‌కు చాలా గ్యాప్ వ‌చ్చిన సంగ‌తి తెలిసిందే. ఆ క్ర‌మంలోనే ప‌వ‌న్ త‌న రీఎంట్రీ కోసం బాలీవుడ్ బ్లాక్ బ‌స్ట‌ర్ పింక్ రీమేక్ ని ఎంపిక చేసుకున్నారు. వ‌కీల్ సాబ్ పేరుతో ఈ సినిమా రీమేకై భారీ ప్రీరిలీజ్ బిజినెస్ ని చేసింది. ప‌వ‌న్ చాలా గ్యాప్ త‌ర్వాత తిరిగి వ‌స్తుండ‌డంతో అభిమానుల్లో ఎంతో ఉత్కంఠ నెల‌కొంది. ఆ క్ర‌మంలోనే వ‌కీల్ సాబ్ పై భారీగా బెట్టింగ్ న‌డుస్తోంది.

స‌రిగ్గా వారంలో రిలీజ్. ఇలాంటి టైమ్ లో ఏపీ లో ఎంపీటీసీ జ‌డ్ పీటీసీ ఎన్నిక‌లకు నోటిఫికేష‌న్ వెలువ‌డ‌డం ప‌వ‌న్ అభిమానుల్లో చ‌ర్చ‌కు వ‌చ్చింది. నోటిఫికేష‌న్ వ‌చ్చేసింది కాబ‌ట్టి ఎల‌క్ష‌న్ జ‌రిగే ప్రాంతాల్లో కోడ్ అమ‌ల‌వుతోంది. చాలా కాలం క్రితం జ‌ర‌గాల్సిన ఈ ఎన్నిక‌లు ఇప్ప‌టికి జ‌రుగుతుండ‌డంతో జ‌నాల్లోనూ ఆస‌క్తి నెల‌కొంది. ఏప్రిల్ 8న పోలింగ్ జ‌రుగుతుంది. 10న కౌంటింగ్ జరగనుంది. అవసరమైన చోట 9న రీపోలింగ్ నిర్వహిస్తారు. ఈ నేప‌థ్యంలో ఇది వ‌కీల్ సాబ్ ‌పై ప్ర‌భావం చూప‌నుంద‌ని విశ్లేషిస్తున్నారు.

ప‌వ‌న్ మానియాతో వకీల్ సాబ్ ట్రైల‌ర్ కేవ‌లం 24 గంటల్లోనే కోటి 80ల‌క్ష‌ల (18 మిలియన్ల)కు పైగా వ్యూస్ సాధించి 2 కోట్ల వ్యూస్ వైపు దూసుకెళుతోంది. ఈ సినిమా విజ‌యంపై ప‌వ‌న్ స‌హా ద‌ర్శ‌కుడు ఆదిత్య శ్రీ‌రామ్.. నిర్మాత‌లు బోనీక‌పూర్ - దిల్ రాజు చాలా ధీమాగా ఉన్నార‌ని తెలుస్తోంది.