లంగా డాన్సులేసే సార్లకు 50 కోట్లు!

ప్రముఖ నిర్మాత, పారిశ్రామికవేత్త పీవీపీ (ప్రసాద్ వీ పొట్లూరి) సినిమాలతోనే కాకుండా అప్పుడప్పుడు తన కామెంట్స్ తో వార్తల్లో నిలుస్తూ ఉంటారు. సోషల్ మీడియా వేదికగా రాజకీయ సమకాలీన అంశాలపై తనదైన శైలిలో నిర్మొహమాటంగా స్పందిస్తుంటారు. తాజాగా దేశవ్యాప్తంగా సోషల్ మీడియాలో వైరల్ అవుతున్న ఓ వీడియోని షేర్ చేశారు. ఇటీవల ముంబైలోని ఓ రైల్వే స్టేషన్‌ లో వేగంగా ట్రైన్ వస్తున్న సమయంలో ఓ చిన్నారి పట్టాలపై ఉండటాన్ని గమనించిన రైల్వే పాయింట్స్ మెన్ తన ప్రాణాలకు తెగించి పాపని కాపాడారు. ఆ వీడియోని ట్విట్టర్ లో షేర్ చేసిన పీవీపీ.. ''రియల్ హీరో బాబు, రీల్ హీరో కాదు. లంగా డాన్సులేసే సార్లకు 50 కోట్లు, ఈ రియల్ హీరోకి జస్ట్ Jawa బైక్.. హతవిధి! మనం చేసే కొంచమైనా, కొట్టె సీటీమార్ లైనా ఇలాంటి సూపర్ హీరోస్‌ కి కొడదాం బ్రదర్స్'' అని ట్వీట్ చేశారు.

అయితే పీవీపీ ట్వీట్ పవన్ కళ్యాణ్ ని ఉద్దేశిస్తూ చేసినదని భావించిన పీకే అభిమానులు ఆయనపై విరుచుకుపడ్డారు. ఇంక పవన్ పై ఎవరైనా కామెంట్ చేస్తే ఒంటి కాలిపై వచ్చే జబర్ధస్త్ కమెడియన్ ఆది కూడా ఈ ట్వీట్ కి రియాక్ట్ అయ్యాడు. ''నీలాంటి లంగా బాబులు కోట్లు ఉన్నా కబుర్లు చెప్పడం తప్ప ఒక్క రూపాయి సాయం చెయ్యరు. పులి ని చూసి నక్క వాత పెట్టుకోవడం అంటే ఇదే. సినిమా వల్ల బతుకుతూ దానినే అవహేళన‌గా మాట్లాడుతున్న నిన్ను కుక్కని కొట్టినట్టు కొట్టాలి అని అనుకుంటున్నారు జనాలు'' అని హైపర్ ఆది ట్వీట్ చేసాడు. దీనికి పవన్ ఫ్యాన్స్ మద్దతుగా నిలుస్తున్నారు. అలానే పీవీపీ ట్వీట్ లో పవన్ గురించి ప్రస్తావించనప్పటికీ కమెడియన్ ఆది.. ఒక స్టార్ ప్రొడ్యూసర్ పై ఇలాంటి వివాదాస్పద వ్యాఖ్యలు చేయడం ఏంటని నెటిజన్స్ ప్రశ్నిస్తున్నారు.