ప్రమోషన్స్ కోసం ఎదురు చూస్తున్నా

'బాహుబలి' ఫ్రాంచైజీ తర్వాత ప్రభాస్ నటిస్తున్న చిత్రం కావడంతో 'సాహో' పై భారీ అంచనాలు ఉన్నాయి. బాలీవుడ్ బ్యూటీ శ్రద్ధా కపూర్ 'సాహో' తో తెలుగు ప్రేక్షకులకు పరిచయం అవుతోంది. భారీ బడ్జెట్ తో తెరకెక్కుతున్న ఈ యాక్షన్ థ్రిల్లర్ లో శ్రద్ధా రెగ్యులర్ గ్లామర్ హీరోయిన్ టైప్ కాకుండా ప్రాధాన్యత ఉండే పాత్ర పోషించింది. అంతే కాదు కొన్ని స్టంట్ సీక్వెన్సులలో కూడా పాల్గొంది. వీటితో పాటు 'సాహో' మల్టి లింగువల్ ఫిలిం కావడంతో ఈ సినిమాపై భారీగా నమ్మకం పెట్టుకుంది శ్రద్ధ.

శ్రద్ధ రీసెంట్ గా ఒక ఇంటర్వ్యూలో మాట్లాడుతూ 'సాహో' ప్రమోషన్స్ కోసం ఆసక్తిగా ఎదురుచూస్తున్నానని తెలిపింది. ముఖ్యంగా తెలుగు పేక్షకులతో ముచ్చటించేందుకు చాలా ఉత్సాహంగా ఉన్నానని చెప్పుకొచ్చింది. బాలీవుడ్ భామలు తెలుగు సినిమాలలో నటించడం సహజమే కానీ శ్రద్ధాకు ఇది మొదటిసారి కావడంతో ఎగ్జైట్ మెంట్ ఎక్కువగా ఉన్నట్టు అనిపిస్తోంది. మరి 'సాహో' ప్రమోషన్స్ కోసం శ్రద్ధా మన తెలుగు రాష్ట్రాలకు వచ్చినప్పుడు తెలుగు ప్రేక్షకులతో ఏం విశేషాలు పంచుకుంటుందో వేచి చూడాలి.

సుజిత్ దర్శకత్వంలో తెరకెక్కుతున్న 'సాహో' ఆగష్టు 15 న ప్రేక్షకుల ముందుకు రానుంది. విడుదలకు ఇక నెల రోజులే ఉంది కాబట్టి త్వరలోనే 'సాహో' మేకర్స్ ప్రమోషన్ కార్యక్రమాల్లో జోరు పెంచే సూచనలు ఉన్నాయి. ఇప్పటికే టీజర్ తో పాటు 'సాహో' నుండి 'సైకో సయ్యా' అనే లిరికల్ సాంగ్ విడుదల చేశారు.. త్వరలొనే మిగతా పాటలు.. ట్రైలర్ హంగామా మొదలవుతుంది.