'ఐకాన్' ప్రాజెక్ట్ బన్నీతో కాదా..? మరో స్టార్ హీరోతోనా..?

స్టార్ ప్రొడ్యూసర్ దిల్ రాజు ఎప్ప‌టినుంచో ఊరిస్తూ వస్తున్న ''ఐకాన్'' ప్రాజెక్ట్ ని పట్టాలెక్కించే పనిలో ఉన్నారని తెలుస్తోంది. ఇటీవల దిల్ రాజు మీడియాతో మాట్లాడుతూ తాము వెంటనే చేయబోయేది 'ఐకాన్' సినిమానే అని వెల్లడించారు. అల్లు అర్జున్ హీరోగా వేణు శ్రీరామ్ దర్శకత్వంలో శ్రీ వెంకటేశ్వర క్రియేషన్స్ బ్యానర్ పై రెండేళ్ల క్రితం ఈ చిత్రాన్ని ప్రకటించగా.. అనివార్య కారణాల వల్ల సెట్స్ పైకి రాలేదు. ఇప్పుడు వేణు శ్రీరామ్ 'వకీల్ సాబ్' తో హిట్ కొట్టడంతో ఐకాన్ ప్రాజెక్ట్ మళ్ళీ వార్తల్లోకి వచ్చింది. అయితే ఇప్పుడు 'ఐకాన్' సినిమాలో హీరో బన్నీ కాదని.. మరో స్టార్ హీరోతో చేయడానికి ప్రయత్నాలు జరుగుతున్నాయని సినీ వర్గాల్లో టాక్ నడుస్తోంది.

దిల్ రాజు 'ఐకాన్' సినిమా చేస్తామని ప్రకటించారు కానీ, హీరో అల్లు అర్జున్ గురించి ఎక్కడా ప్రస్తావించకపోవడం అనేక అనుమానాలకు తావిస్తోంది. దీనికి తోడు ఈ సందర్భంగా 'ఐకాన్ స్టార్' ట్యాగ్ లైన్ గురించి నిర్మాత చేసిన వ్యాఖ్యలు కూడా బన్నీ ఈ ప్రాజెక్ట్ చేయడం లేదనే విషయాన్ని వెల్లడిస్తున్నాయని కామెంట్స్ వస్తున్నాయి. 'ఐకాన్ స్టార్ అని ఆయన పెట్టుకున్నాడు.. మనం పెట్టింది కాదు' అని దిల్ రాజు అనడంపై అల్లు అర్జున్ అభిమానులకు ఇబ్బంది కలిగించాయి. అదే సమయంలో 'ఐకాన్' సినిమా బన్నీ చేయడం లేదనే సంకేతాలు కూడా ఇస్తున్నాయని అంటున్నారు.

ఈ నేపథ్యంలో కారణాలేవైనా అల్లు అర్జున్ 'ఐకాన్' చేయడం లేదని.. ఈ స్క్రిప్ట్ పై పూర్తి నమ్మకం పెట్టుకున్న దిల్ రాజు ఇప్పుడు వేరే హీరో కోసం ప్రయత్నాలు చేస్తున్నారని టాక్ వినిపిస్తోంది. 'ఐకాన్ - కనబడుటలేదు' ప్రాజెక్ట్ గురించి వస్తున్న వార్తల్లో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే.