మహేశ్ కనిపిస్తే చాలు .. కోట్ల వర్షమే!

మహేశ్ బాబు కి ఉన్న క్రేజ్ ను గురించి ప్రత్యేకంగా చెప్పుకోవలసిన పనిలేదు. మహేశ్ బాబు పాన్ ఇండియా సినిమాలు చేయడానికి ఆసక్తిని చూపకపోయినా, ఆయనకి ఆ రేంజ్ క్రేజ్ ఆల్రెడీ ఉంది. అందువలన పెద్ద పెద్ద సంస్థలు తమ బ్రాండ్స్ ను ప్రమోట్ చేసుకోవడానికి టాలీవుడ్ నుంచి మహేశ్ బాబునే ఎక్కువగా ఎంచుకుంటూ ఉంటాయి. మహేశ్ బాబు మంచి హైటూ .. అందుకు తగిన ఫిజిక్ తో హాలీవుడ్ హీరోలను గుర్తుచేస్తుంటాడు. అందువలన ఆయనను తమ బ్రాండ్ అంబాసిడర్ గా నియమించుకోవడానికి కంపెనీలు ఉత్సాహాన్ని చూపుతుంటాయి .. ఆసక్తిని కనబరుస్తుంటాయి.

ప్రస్తుతం మహేశ్ బాబు డజనుకు పైగా బ్రాండ్స్ ఎండోర్స్ చేస్తున్నాడు. ఆయా బ్రాండ్స్ ను బట్టి ఆయన పారితోషికాన్ని తీసుకుంటూ ఉంటాడు. అయితే ఒక యాడ్ లో కనిపించేది కొన్ని సెకన్లు మాత్రమే కనుక, పారితోషికం పెద్దగా ఉండకపోవచ్చని అనుకుంటే అంతకుమించిన అమాయకత్వం మరొకటి ఉండదు. కనిపించేది కాసేపే అయినా దాని లెక్కలు వేరే ఉంటాయి .. ఆ లెక్క ప్రకారం మహేశ్ ఒక్కో యాడ్ కి తీసుకునే పారితోషికం కోట్లలో ఉంటుంది. ఇక ఆయన ఆ వైపున కూడా పారితోషికాన్ని పెంచేసినట్టుగా చెప్పుకుంటున్నారు.

మహేశ్ చేసిన యాడ్స్ లో 'మౌంటెన్ డ్యూ' ఒకటి. హిందీలో హృతిక్ రోషన్ తో చేసిన ఈ యాడ్ ను తెలుగులో మహేశ్ తో చేశారు. ఈ యాడ్ కోసం ఆయన తీసుకున్న పారితోషికం 12 కోట్లని అంటున్నారు. బుర్జ్ ఖలీఫా నేపథ్యంలో ఈ యాడ్ ను చిత్రీకరించారు. గతంలో కూడా ఇక్కడ ఈ యాడ్ ను మహేశ్ తోనే చేశారు. అయితే అప్పుడు ఆయన తీసుకున్న పారితోషికం 7 కోట్లట. ఈ సారి మాత్రం ఆయన 12 కోట్లు తీసుకున్నాడని అంటున్నారు. సోషల్ మీడియాలోనూ ఆయన ఈ బ్రాండ్ ను ప్రమోట్ చేయవలసి ఉంటుందట. అందువల్లనే ఆయనకి ఎక్కువ మొత్తం ముట్టజెప్పినట్టుగా టాక్.

ఇక ప్రస్తుతం మహేశ్ బాబు 'సర్కారువారి పాట' సినిమా చేస్తున్నాడు. పరశురామ్ దర్శకత్వం వహిస్తున్న ఈ సినిమాకి మహేశ్ బాబు కూడా ఒక నిర్మాతగా వ్యవహరిస్తున్నాడు. కీర్తి సురేశ్ కథానాయికగా నటిస్తున్న ఈ సినిమా, చిత్రీకరణ పరంగా ముగింపు దశకి చేరుకుంది. మే 13వ తేదీన ఈ సినిమాను ప్రపంచవ్యాప్తంగా విడుదల చేయనున్నారు. ఇక ఆ తరువాత సినిమాను ఆయన త్రివిక్రమ్ దర్శకత్వంలో చేయనున్నాడు. అందుకు సంబంధించిన సన్నాహాలు కూడా ఒక వైపున జరిగిపోతూనే ఉన్నాయి. ఆ తరువాత రాజమౌళి ప్రాజెక్టును లైన్లో పెట్టేశాడు. ఈ సినిమా తరువాత కొరటాల .. అనిల్ రావిపూడి లైన్లోకి వచ్చే అవకాశాలు ఉన్నాయని చెప్పుకుంటున్నారు.