'ఉప్పెన' సక్సెస్ పట్ల మహేష్ సైతం హ్యాపీగా ఉంటే.. బన్నీ ఏంటి సైలెంటుగా ఉన్నాడు..!

మెగా హీరో పంజా వైష్ణవ్ తేజ్ డెబ్యూ మూవీ 'ఉప్పెన' తో అదిరిపోయే కలెక్షన్లు సాధిస్తున్నాడు. బుచ్చిబాబు దర్శకత్వంలో రూపొందించిన ఈ చిత్రం గత శుక్రవారం ప్రేక్షకుల ముందుకు వచ్చి కళ్లు చెదిరే రీతిలో వసూళ్ళు రాబడుతోంది. తొలి మూడు రోజుల్లోనే ప్రపంచవ్యాప్తంగా 28 కోట్లకు పైగా షేర్ రాబట్టి 50 కోట్ల గ్రాస్‌ ను కలెక్ట్ చేసింది.

కరోనా వంటి విపత్కర పరిస్థితుల తర్వాత 'ఉప్పెన' సినిమా ఇలాటి విజయం అందుకోవడం పట్ల ఇండస్ట్రీ ప్రముఖులు సైతం ఆనందం వ్యక్తం చేస్తున్నారు. హీరోలు సుమంత్ - శర్వానంద్.. హీరోయిన్లు రకుల్ ప్రీత్ సింగ్ - రష్మిక మందన్నా.. డైరెక్టర్ క్రిష్ వంటి వారు 'ఉప్పెన' సినిమా బాగుందంటూ అభినందించారు. ఇప్పుడు తాజాగా సూపర్ స్టార్ మహేష్ బాబు ట్వీట్ చేస్తూ 'ఉప్పెన' సినిమా సూపర్ సక్సెస్ గురించి వినడానికి సంతోషంగా ఉంది.. కొత్తగా వచ్చిన వైష్ణవ్ తేజ్ - కృతిశెట్టితో పాటు మొత్తం చిత్ర బృందానికి అభినందనలు.

ఈ సినిమా చూడటానికి ఆతృతగా ఎదురుచూస్తున్నానని పేర్కొన్నాడు. అయితే 'ఉప్పెన' సక్సెస్ పట్ల మెగా ఫ్యామిలీకి చెందిన అల్లు అర్జున్ కనీసం ఓ ట్వీట్ కూడా చేయకపోవడంపై మెగా ఫ్యాన్స్ సోషల్ మీడియాలో ప్రశ్నిస్తున్నారు.

నిజానికి మెగా ఫ్యామిలీ నుంచి వస్తున్న హీరో కావడంతో 'ఉప్పెన' సినిమా రిలీజ్ కి ముందు తర్వాత కూడా మెగా కుటుంబ సభ్యులు ప్రమోట్ చేస్తూ వచ్చారు. చిరంజీవి - రామ్ చరణ్ - వరుణ్ తేజ్ - నిహారిక - నాగబాబు వంటి వారు సినిమా చూసి అభినందనలు తెలిపారు. ఇక చరణ్ అయితే సక్సెస్ మీట్ కి చీఫ్ గెస్ట్ గా వెళ్లనున్నాడు. అయితే బన్నీ మాత్రం ఇంతవరకు 'ఉప్పెన' గురించి ఎలాంటి ప్రస్తావన తేలేదు.

మెగా హీరో అనేది పక్కన పెట్టినా, ఈ సినిమా ప్రొడ్యూసర్స్ మైత్రీ మూవీస్ వారు మరియు సుకుమార్ బన్నీ కి సన్నిహితులు. ప్రస్తుతం వీరి కలయికలో 'పుష్ప' సినిమా రూపొందుతోంది. అయినప్పటికీ అల్లు అర్జున్ ఈ సినిమాను ప్రమోట్ చేయలేదు. ఇప్పుడు మహేష్ బాబు కూడా 'ఉప్పెన' సక్సెస్ పట్ల హ్యాపీగా ఉన్నానని ట్వీట్ చేయడంతో.. బన్నీ ఇలా ఎందుకు సైలెంటుగా ఉంటున్నాడనే ప్రశ్న మెగా అభిమానుల్లో తలెత్తుతోంది. మరి బన్నీ త్వరలోనే మెగా హీరో డెబ్యూ మూవీ గురించి ఓ ట్వీట్ చేసి ఈ వార్తలకు చెక్ పెడతాదేమో చూడాలి.