ఇలాగైతే నిత్యామీనన్ ను మరిచిపోతారేమో!

అందానికి అందం .. అభినయానికి అభినయం సమంగా తూకం వేస్తే నిత్యామీనన్. చక్కని రూపం .. ఆకర్షణీయమైన కళ్లు .. ప్రత్యేకమైన వాయిస్ ఆమె సొంతం. కథలు .. పాత్రల ఎంపికతోనే తనకంటూ ఆమె ఓ ప్రత్యేకమైన గుర్తింపును తెచ్చుకుంది. తెలుగుతో పాటు తమిళ .. మలయాళ .. కన్నడ భాషల్లో అదే గుర్తింపుతో ఆమె కొనసాగుతూ వెళ్లడం విశేషం. సాయిపల్లవి కంటే ముందుగా, పారితోషికం కంటే పాత్రలకే ప్రాధాన్యతనిచ్చిన నాయికగా నిత్యామీనన్ కనిపిస్తుంది. ఏ ఇండస్ట్రీకి వెళ్లి అడిగినా ఆమె నెంబర్ వన్ ఆర్టిస్ట్ అనే మాటే వినిపిస్తుంది.

తెలుగు తెరకి 'అలా మొదలైంది' సినిమాతో పరిచయమైన నిత్యామీనన్, 'ఇష్క్' .. 'గుండెజారి గల్లంతయ్యిందే' సినిమాలతో స్టార్ స్టేటస్ ను అందుకుంది. ఆమె నటన ఎంత గొప్పగా ఉంటుందనడానికి నిదర్శనంగా 'మళ్లీ మళ్లీ ఇది రానిరోజు' కనిపిస్తుంది. 'సన్నాఫ్ సత్యమూర్తి' .. 'జనతా గ్యారేజ్' సినిమాలు, నిత్యా మీనన్ తన పాత్రల్లో ఎలా ఒదిగిపోతుందనేది వివరంగా చెబుతాయి. అయితే అప్పటి నుంచి ఆమెకి అవకాశాలు తగ్గుతూ వచ్చాయి. ఆ తరువాత చేసిన పాత్రలు కూడా పెద్దగా గుర్తుపెట్టుకోదగినవి కాదు. తమిళ .. మలయాళ భాషల్లోను ఆమె బిజీగా లేదు.

తెలుగు విషయానికొస్తే ఆమె 'గమనం' అనే సినిమాలో ఒక ముఖ్యమైన పాత్రను చేసింది. త్వరలో ఈ సినిమా ప్రేక్షకుల ముందుకు రానుంది. ఆ తరువాత మరో ప్రాజెక్ట్ చేస్తున్నట్టుగా వార్తలు వచ్చినా, ఆ తరువాత ఎలాంటి అప్ డేట్స్ లేవు. ఒకానొక దశలో నిత్యామీనన్ వరుస సినిమాలు చేసుకుంటూ వెళ్లింది. తను ఒక సినిమాలో ఉందంటే, ఆ కథలో దమ్ము ఉంటుందనే నమ్మకాన్ని ఆడియన్స్ కి కలిగించింది. తమ సినిమాల్లో ప్రత్యేక పాత్రల్లో ఆమె కనిపించినా చాలని అనుకున్న దర్శక నిర్మాతలు ఉన్నారు. అలాంటి నిత్యామీనన్ కెరియర్ మసకబారడం అభిమానులకు బాధను కలిగించే విషయమే. అవకాశాలు వస్తే చేద్దాం .. లేదంటే లేదని నిత్యామీనన్ అనుకుంటే, ఇంకొంతకాలానికి ఇక్కడి ప్రేక్షకులు ఆమెను మరిచిపోతారేమో!