శ్రీలీల హోటల్ ఖర్చు న్యూస్ అయ్యిందే!

'పెళ్లి సందD' సినిమాతో టాలీవుడ్ లో హీరోయిన్ గా అడుగుపెట్టింది యంగ్ బ్యూటీ శ్రీలీల. గ్లామర్ షోతో అదరగొట్టిన ఈ ముద్దుగుమ్మ.. ఎంట్రీతోనే దర్శక నిర్మాతల దృష్టిలో పడింది. ఈ క్రమంలో ప్రస్తుతం వరుస అవకాశాలు అందుకుంటూ దూసుకుపోతోంది. అయితే ఆమెకు సంబంధించిన ఓ ఆసక్తికరమైన న్యూస్ ఇప్పుడు నెట్టింట చక్కర్లు కొడుతోంది.

ఇప్పుడు శ్రీ లీల చేతిలో ఉన్న అర డజను ప్రాజెక్ట్స్ లో #PVT04 ఒకటి. మెగా మేనల్లుడు పంజా వైష్ణవ్ తేజ్ హీరోగా నటిస్తున్న ఈ సినిమాని శ్రీకాంత్ రెడ్డి అనే కొత్త దర్శకుడు తెరకెక్కిస్తున్నారు. సితార ఎంటర్‌టైన్‌మెంట్స్‌ - ఫార్చ్యూన్ ఫోర్ సినిమాస్ బ్యానర్లపై త్రివిక్రమ్ భార్య సాయి సౌజన్యతో కలిసి నాగవంశీ నిర్మిస్తున్నారు. అయితే ఈ సినిమా కోసం శ్రీ లీల వసతి ఖర్చులు బాగా ఎక్కువ అవుతున్నాయని రూమర్స్ వస్తున్నాయి.

మూడు వారాల పాటు వైష్ణవ్ తేజ్ సినిమా షూటింగ్ లో పాల్గొనాల్సి ఉండగా.. దీని కోసం శ్రీలీల ఆమె తల్లితో కలిసి నెల రోజుల పాటు హైదరాబాద్ లోనే ఉంటుందట. ఇందులో భాగంగా వాళ్ళకి ఓ 7-స్టార్ హోటల్‌ లోని సూట్ రూమ్‌ బుక్ చేసారట. దీనికి రోజుకు దాదాపు రూ.20 వేలకు పైగానే పే చేస్తున్నారట. అంటే శ్రీ లీల షూటింగ్ లో పాల్గొనడానికి 6 లక్షలకు పైగానే ఖర్చు అవుతుందన్నమాట.

హీరోయిన్ ఒక షెడ్యూల్ కు హాజరైతే.. వసతి కోసం అంత మొత్తంలో ఖర్చు అవుతుందనేది ఇప్పుడు హాట్ టాపిక్ గా మారింది. ఇలా అయితే బడ్జెట్ ఎలా కంట్రోల్ లో ఉంటుంది? అనే ప్రశ్నలు వస్తున్నాయి. హీరోయిన్ పారితోషకంలోనే వసతి మరియు ప్రయాణ ఖర్చులు ఉంటాయనే గిల్డ్ కొత్త రూల్ ని వర్తింపజేయడం లేదా? అని సందేహాలు వ్యక్తం చేస్తున్నారు.

ఇందులో నిజమెంతో తెలియదు కాని.. ఇప్పుడు సోషల్ మీడియాలో శ్రీ లీల సూట్ గది గురించే టాక్ నడుస్తోంది. ఇదిలా ఉంటే ఈ బ్యూటీ ఒక్కో సినిమాకి కోటి వరకూ రెమ్యునరేషన్ తీసుకుంటోందని ప్రచారం జరుగుతోంది. అయినప్పటికీ ఆమె డేట్స్ కోసం నిర్మాతలు క్యూ కడుతున్నారు. అవన్నీ టాలీవుడ్ లోని పెద్ద బ్యానర్లు అవడం గమనార్హం.

మాస్ మహారాజా రవితేజ - త్రినాథరావు నక్కిన కాంబినేషన్లో తెరకెక్కుతున్న 'ధమాకా' సినిమాలో శ్రీ లీల హీరోయిన్ గా నటిస్తోంది. అలానే యూత్ స్టార్ నితిన్ మరియు దర్శక రచయిత వక్కంతం వంశీ కలిసి చేస్తున్న సినిమాలోనూ ఆమెనే మెయిన్ హీరోయిన్.

సితార బ్యానర్ లో యువ హీరో నవీన్ పోలిశెట్టికి జోడీగా 'అనగనగా ఒక రాజు' అనే సినిమా చేస్తోంది. వారాహి బ్యానర్ లో గాలి జనార్ధన్ రెడ్డి తనయుడు కిరీటి హీరోగా లాంచ్ అవుతున్న చిత్రంలోనూ శ్రీ లీల హీరోయిన్ గా నటిస్తోంది.

అంతేకాదు నందమూరి బాలకృష్ణ - అనిల్ రావిపూడి కాంబోలో రానున్న సినిమాలో ఈ యంగ్ బ్యూటీ కీలక పాత్ర పోషించనుంది. దిల్ రాజు ఫ్యామిలీ హీరో ఆశిష్ నటిస్తున్న 'సెల్ఫిష్' సినిమాలో శ్రీ లీలనే హీరోయిన్ గా ఫైనలైజ్ చేసినట్లు సమాచారం. ఇలా వరుస సినిమాలతో పెళ్లి సందడి భామ ఏడాది పొడవునా బిజీగా ఉండనుంది.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.