నారా రోహిత్ సినిమాకు ఇళయరాజా

నారా రోహిత్ ను బాగా అభిమానించేవాళ్లు, అతణ్ని ఫాలో అయ్యేవాళ్లను కూడా అతను ప్రస్తుతం ఏమేం సినిమాలు చేస్తున్నాడో చెప్పమంటే ఠకీమని జవాబివ్వలేని పరిస్థితి. ప్రస్తుత యంగ్ హీరోల్లో ఎవరికీ సాధ్యం కాని రీతిలో ఏడెనిమిది సినిమాలు లైన్ లో పెట్టాడు రోహిత్. అందులో కొన్ని పూర్తయ్యాయి. కొన్ని షూటింగ్ జరుపుకుంటన్నాయి. ఇంకొన్ని త్వరలోనే మొదలుకాబోతున్నాయి. అలా రోహిత్ కమిటైన సినిమాల్లో ‘కథలో రాజకుమారి’ ఒకటి. సూరపనేని అనే కొత్త దర్శకుడు ఈ సినిమాతో తెలుగు ప్రేక్షకులకు పరిచయమవుతున్నాడు.

‘కార్తికేయ’ లాంటి సూపర్ హిట్ అందించిన మాగ్నస్ సినీ ప్రైమ్ ప్రైవేట్ లిమిటెడ్ బేనర్ మీద బి.వి.శ్రీనివాస్ ఈ సినిమాను నిర్మిస్తున్నాడు. భిన్నమైన కథాంశంతో తెరకెక్కుతున్న ఈ సినిమాకు టాప్ క్లాస్ టెక్నీషియన్స్ ని తీసుకుంటున్నారు. ఇప్పటికే ప్రముఖ సినిమాటోగ్రాఫర్ జయేష్ నాయర్ ను ఈ సినిమాకు ఒప్పించారు. మరోవైపు లెజెండరీ మ్యూజిక్ డైరెక్టర్ ఇళయరాజా కూడా ఈ చిత్రానికి సంగీతాన్నందించడానికి ఓకే అన్నారట. ఇటీవలే మేస్ట్రోకు స్క్రిప్టు వినిపించగా ఆయనకు నచ్చి సరే అన్నారని సమాచారం. ఈ సినిమాలో రోహిత్ సరసన మలయాళ బ్యూటీ నమిత ప్రమోద్ నటించబోతోంది.