క‌త్రిన సోద‌రుడితో ఇలియానా డేటింగ్ క‌న్ఫామ్

ఇలియానా డి క్రజ్ కొత్త ప్రేమాయ‌ణం గ‌త కొంత‌కాలంగా గుబులు రేపుతున్న సంగ‌తి తెలిసిందే. స్టార్ హీరోయిన్ కత్రినా కైఫ్ సోదరుడు సెబాస్టియన్ లారెంట్ మిచెల్ ను ఇలియానా పెళ్లి చేసుకోబోతోందంటూ ఇటీవ‌ల ప్ర‌చారం సాగుతోంది.

కత్రినా కైఫ్ సోదరుడు సెబాస్టియన్ తో ఇలియానా సాన్నిహిత్యం గ‌త కొద్ది రోజులుగా బాలీవుడ్ మీడియాలో హాట్ టాపిక్. జూలై 16న జరిగిన కత్రిన పుట్టినరోజు వేడుకలో కత్రినా తన భర్త,.. నటుడు విక్కీ కౌశల్.. ఇలియానా బృందం మాల్దీవుల్లో సెబాస్టియన్ తో కలిసి ఎంజాయ్ చేస్తున్న ఫోటోలు వైర‌ల్ అయ్యాయి. ఈ ఫోటోల్లో సెబాస్టియ‌న్ తో ఇలియానా సాన్నిహిత్యం చూశాక‌.. దీనిపై ఆరాలు మొద‌ల‌య్యాయి.

వెకేషన్ స్నాప్ లు వైరల్ గా మారిన వెంటనే ఇలియానాతో కత్రినా అసాధారణ స్నేహం గురించి ర‌క‌ర‌కాల‌ ఊహాగానాలు కొన‌సాగాయి. అటుపై కత్రినా సోదరుడు.. మోడల్ సెబాస్టియన్ తో ఇలియానా సన్నిహితంగా మెలుగుతోంద‌ని దీనివ‌ల్ల‌నే ఇద్దరు నటీమణులు (క‌త్రిన‌-ఇలియానా) ద‌గ్గ‌రై అది స్నేహానికి దారితీసిందని ముంబై మీడియా క‌థ‌నాలు రాసింది.

ఇప్పుడు సెబాస్టియన్ ను ఇలియానా పెళ్లి చేసుకోబోతోందన్న పుకారు నెటిజన్లలో దావానలంలా వ్యాపించింది. తాజా స‌మాచారం ప్రకారం..త‌న‌ పెళ్లి కోసం ఇలియానా షాపింగ్ లు చేస్తూ బిజీగా ఉంద‌ని కూడా టాక్ వినిపిస్తోంది.

ప్ర‌ముఖ‌ జాతీయ మీడియా క‌థ‌నం ప్ర‌కారం.. దాదాపు ఆరు నెలలుగా రిలేషన్ షిప్ ని కొన‌సాగిస్తున్న ఈ జంట మీడియా కంటికి చిక్క‌కుండా దాక్కుంటోంది. ఇలియానా- సెబాస్టియన్ కత్రినా బాంద్రా ఇంట్లో (పాత ఇల్లు) లేదా ఇలియానా నివాసంలో ఒకరితో ఒకరు త‌మ విలువైన‌ సమయాన్ని గడుపుతున్నార‌ని కూడా క‌థ‌నాలొచ్చాయి. ముంబై మీడియా క‌థ‌నాలు నిజ‌మే అయితే.. ఈ జంట త్వరలో ఓ ఇంటివాళ్ల‌య్యే అవకాశం ఉంద‌ని గుసగుస‌లు వినిపిస్తున్నాయి.

నీబోన్ తో బ్రేక‌ప్ అయ్యాక‌..

ఇలియానా గతంలో ప్రముఖ ఆస్ట్రేలియన్ ఫోటోగ్రాఫర్ ఆండ్రూ నీబోన్ తో డేటింగ్ చేసింది. కొన్నేళ్ల పాటు డేటింగ్ చేయ‌డంపై బాలీవుడ్ లో చర్చనీయాంశంగా మారింది. అయితే వ‌న్ ఫైన్ డే స‌డెన్ గా బ్రేకప్ అయ్యింది ఈ జంట. కానీ దాని గురించి బహిరంగంగా మాట్లాడకుండా ఉండాలని ఇలియానా నిర్ణయించుకుంది. డిప్రెష‌న్ నుంచి బ‌య‌ట‌ప‌డ్డాక‌ ఎట్ట‌కేల‌కు ఇప్పుడు ఇలియానాకు మళ్లీ ప్రేమ దొరికింది. క‌త్రిన సోద‌రుడితో జ‌త కుదిరింది.

కాఫీ విత్ క‌ర‌ణ్ లో లీకులు

ప్ర‌స్తుత కాఫీ విత్ క‌ర‌ణ్ 7 సీజ‌న్ లో తార‌ల ర‌హ‌స్యాల‌ను లీక్ చేస్తున్న క‌ర‌ణ్ ఇలియానా- సెబాస్టియ‌న్ జంట ర‌హ‌స్యాన్ని కూడా లీక్ చేసారు. సెబాస్టియన్ లవ్ లైఫ్ కి సంబంధించి కొన్ని ఆసక్తికర వ్యాఖ్య‌లు చేయ‌డంతో ఇలియానా కొత్త ల‌వ్ క‌న్ఫామ్ అయ్యింది. నిజానికి క‌త్రిన మాల్దీవుల విహారం నుంచి కొన్ని ఫోటోలు బ‌య‌టికి రాగానే త‌న మైండ్ లో కొన్ని ప్ర‌శ్న‌లు గిర్రున తిరిగాయ‌ని క‌ర‌ణ్ అన్నాడు. ఇలియానా- సెబాస్టియన్ మొద‌టిసారి ఓ పార్టీలో కలిశారు. ఇంత‌లోనే అంత వేగంగా క‌థ నడిచిందేమిటో అనుకున్నాన‌ని కూడా క‌రణ్ త‌న‌దైన శైలిలో అన్నారు. ఆ వ్యాఖ్య‌లు విని నవ్వేసిన క‌త్రిన‌.. కరణ్ పార్టీలో అందరిననీ గమనిస్తుంటారని చురక అంటించింది. మొత్తానికి ఇలియానా గుట్టు మొత్తం క‌ర‌ణ్ విప్పేసాడు. ఆ ఇద్ద‌రి ప్రేమాయ‌ణాన్ని క‌న్ఫామ్ చేసేశాడు. త్వ‌ర‌లో పెళ్లికి ముహూర్తం ఫిక్స్ చేసుకోవ‌డ‌మే ఆల‌స్యం.

సెబాస్టియన్ గురించి వివ‌రాలు ఆరా తీస్తే.. అత‌డు తన వ్యక్తిగత జీవితాన్ని ప్రైవేట్ గా ఉంచడానికి ఇష్టపడ‌తాడు. అతను సోషల్ మీడియా యాక్టివ్ యూజర్ కాదు. సెబాస్టియన్ ఇన్ స్టాగ్రామ్ ఖాతా కూడా ప్రైవేట్ గా ఉంది.

కెరీర్ సంగ‌తి ఇలా ఉంది!

ఇలియానా చివరిసారిగా దర్శకుడు కూకీ గులాటీ - ది బిగ్ బుల్ లో అభిషేక్ బచ్చన్ సరసన కనిపించింది. త‌దుప‌రి ఓ రెండు చిత్రాల్లో న‌టించ‌నుంది. ఆమె రణదీప్ హుడాతో అన్ ఫెయిర్ అండ్ లవ్లీలో న‌టిస్తోంది. విద్యాబాలన్- సెంధిల్ రామమూర్తి - ప్రతీక్ గాంధీ టైటిల్ పాత్రల్లో నటించిన శిర్షా గుహా ఠాకూర్ కామెడీ-డ్రామా 'లవర్స్‌'లో కూడా ఇలియానా నటించింది.




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.