ఈ బ్యానర్ వల్లనే నాకు అదృష్టం కలిసొచ్చింది: యంగ్ డైరెక్టర్

టాలీవుడ్ యంగ్ డైరెక్టర్ నాగ్ అశ్విన్ త్వరలో విడుదల కాబోతున్న జాతిరత్నాలు సినిమాతో నిర్మాతగా మారబోతున్నాడు. పూర్తిస్థాయి వినోదభరిత సినిమాగా తెరకెక్కిన ఈ సినిమా మహాశివరాత్రి కానుకగా మార్చ్ 11న గ్రాండ్ రిలీజ్ కాబోతుంది. యువహీరో నవీన్ పొలిశెట్టి, ప్రియదర్శి పులికొండ, రాహుల్ రామకృష్ణ ముగ్గురు ప్రధానపాత్రలలో తెరకెక్కిన ఈ సినిమాతో కే.వి అనుదీప్ దర్శకుడుగా పరిచయం అవుతున్నాడు. అలాగే ఈ సినిమాతో ఫరియా అబ్దుల్లా హీరోయిన్ గా డెబ్యూ అవుతోంది. అయితే తమ సినిమా చూసేందుకు థియేటర్లకు వచ్చే ప్రేక్షకులు అందరికి ఆరోగ్య జాగ్రత్తరీత్యా మాస్కులు అందించనున్నట్లు నాగ్ అశ్విన్ తాజాగా తెలిపాడు. ఈ సినిమా హక్కులకోసం ఓటిటిలు పోటీ పడినప్పటికి భారీ ప్రైస్ ఆఫర్ చేసినా కూడా మా సినిమాను థియేటర్లలో మాత్రమే విడుదల చేయాలనీ నిర్ణయించుకున్నట్లు నాగ్ వెల్లడించాడు.

నిజానికి మా చిన్నసినిమాకు ఓటిటిల నుండి ఇంత ఫాన్సీ ఆఫర్స్ వస్తాయని అసలు ఊహించలేదు. కానీ మేం మొదటినుండి థియేటర్లలో మాత్రమే విడుదల చేయాలనీ ఇంతకాలం వెయిట్ చేసాం. మాకు బడ్జెట్ గురించి పెద్దగా లెక్కలు వేయలేదు. ఎందుకంటే కేవలం వినోదం అందించాలని లక్ష్యంగా పెట్టుకున్నాం అంతే' అని నాగ్ అశ్విన్ ఈ సందర్బంగా చెప్పుకొచ్చాడు. ఇక వైజయంతి బ్యానర్ గురించి మాట్లాడుతూ.. వైజయంతి బ్యానర్ వల్లనే నాకు అదృష్టం కలిసివచ్చింది. నిజానికి నా సినిమాల స్క్రిప్ట్స్ పట్టుకొని తిరిగేటప్పుడు నాకెవరు ఛాన్స్ ఇవ్వలేదు. ఎవడే సుబ్రహ్మణ్యం, మహానటి సినిమాలకు కూడా ఇంత బడ్జెట్ పెట్టడానికి ఎవరు ముందుకు రాలేదు. అంతేగాక ప్రభాస్ తో భారీ బడ్జెట్ మూవీ అంగీకరించడం గొప్ప విషయం.. అందుకే వైజయంతి వల్లనే నా అదృష్టం మారిందని చెబుతున్నాడు ఈ యువదర్శకుడు.