అల.. బాలీవుడ్ లో.. 'షెహజాదా' షూటింగ్ షురూ..!

త్రివిక్రమ్ శ్రీనివాస్ దర్శకత్వంలో అల్లు అర్జున్ - పూజాహెగ్డే హీరోహీరోయిన్లుగా తెరకెక్కిన చిత్రం 'అల వైకుంఠపురములో'. గీతా ఆర్ట్స్ - హారిక & హాసిని క్రియేషన్స్ బ్యానర్స్ పై రూపొందిన ఈ సినిమా బ్లాక్ బస్టర్ సక్సెస్ అయింది. ఈ చిత్రాన్ని హిందీలో రీమేక్ చేయడానికి ఎప్పటి నుంచో ప్రయత్నాలు జరుగుతున్న సంగతి తెలిసిందే. అయితే బాలీవుడ్ దర్శకుడు డేవిడ్ ధావన్ దర్శకత్వంలో ''షెహజాదా'' అనే పేరుతో ఈ రీమేక్ సినిమా తెరకెక్కనుంది.

'షెహజాదా' చిత్రంలో బాలీవుడ్ యంగ్ హీరో కార్తీక్ ఆర్యన్ - 'ఆదిపురుష్' భామ కృతి సనన్ హీరోహీరోయిన్లుగా నటిస్తున్నారు. 'షెహజాదా' అంటే తెలుగులో 'యువరాజు' అని అర్థం. 'అల వైకుంఠపురములో' కథకు తగ్గట్లుగా ఉంటుందని ఈ టైటిల్ ని ఖరారు చేసినట్లు తెలుస్తుంది. ఈ సినిమా రెగ్యులర్ షూటింగ్ ఈరోజు సోమవారం స్టార్ట్ అయింది.

'షెహజాదా' సినిమా షూటింగ్ మొదలైన విషయాన్ని వెల్లడించిన మేకర్స్.. క్లాప్ బోర్డ్ పట్టుకున్న కార్తీక్ ఆర్యన్ బ్యాక్ సైడ్ లుక్ ని సోషల్ మీడియాలో షేర్ చేశారు. డ్రెస్సింగ్ స్టైల్ చూస్తుంటే ఈ రీమేక్ కోసం అల్లు అర్జున్ ని ఫాలో అయిపోతున్నట్లు అర్థం అవుతోంది. షూటింగ్ మొదలు పెట్టిన రోజే ఈ మూవీ రిలీజ్ డేట్ ని కూడా అనౌన్స్ చేశారు. 2022 నవంబర్ 4న ఈ చిత్రాన్ని ప్రేక్షకుల ముందుకు తీసుకురానున్నట్లు తెలిపారు.

గీతా ఆర్ట్స్ - హారిక & హాసిని క్రియేషన్స్ - టీ సిరీస్ - బ్రాత్ ఫిలిమ్స్ సంస్థలు కలిసి ''షెహజాదా'' చిత్రాన్ని నిర్మిస్తున్నాయి. మెగా ప్రొడ్యూసర్ అల్లు అరవింద్ - ఎస్ రాధాకృష్ణ - భూషణ్ కుమార్ - అమన్ గిల్ నిర్మాతలుగా వ్యవహరిస్తున్నారు. ఈ చిత్రంలో నటించే ప్రధాన నటీనటుల వివరాలను మేకర్స్ వెల్లడించారు. తెలుగులో టబు పోషించిన పాత్రలో సీనియర్ నటి మనీషా కొయిరాల నటిస్తోంది. దీని కోసం ముందుగా టబు నే సంప్రదించగా.. ఆమె డేట్స్ ఖాళీ లేకపోవడంతో మనీషా ను ఎంపిక చేసినట్లు తెలుస్తోంది.

అలానే ప్రముఖ బాలీవుడ్ నటుడు పరేష్ రావల్ - రోనీత్ బోస్ రాయ్ - మాతృకలో ఉన్న సచిన్ కేడేఖర్ - అంకుర్ రాథీ - సన్నీ హిందూజా ఈ చిత్రంలో ఇతర ప్రధాన పాత్రలు పోషిస్తున్నారు. తెలుగులో సంచలన విజయం సాధించిన ఫ్యామిలీ ఎంటర్టైనర్ రీమేక్ గా తెరకెక్కుతున్న ''షెహజాదా''.. హిందీలో ఎలాంటి సక్సెస్ అందుకుంటుందో చూడాలి.