అవ‌స‌రాల‌-అడివి.. అమీతుమీ తేల్చుకుంటార‌ట‌

‘జెంటిల్ మ‌న్’ సినిమాతో ఫామ్ లోకి వ‌చ్చిన ఇంద్ర‌గంటి మోహ‌న‌కృష్ణ అవ‌స‌రాల శ్రీనివాస్.. అడివి శేష్ కాంబినేష‌న్లో ఒక రొమాంటిక్ కామెడీ మూవీకి శ్రీకారం చుట్టిన సంగ‌తి తెలిసిందే. ఈ చిత్రానికి ‘అమీతుమీ’ అనే టైటిల్ నిర్ణ‌యించాడు ఇంద్ర‌గంటి. ఈ టైటిల్ ప్ర‌క‌టిస్తూ లోగో కూడా లాంచ్ చేశాడీ విల‌క్ష‌ణ ద‌ర్శ‌కుడు. త‌న సినిమాల్లో ఏదో ఒక వైవిధ్యం చూపించాల‌ని త‌పించే ఇంద్ర‌గంటి.. ‘అమీతుమీ’ లోగోలోనే త‌న క్రియేటివిటీ చూపించాడు. అక్ష‌రాల్లోనే అమ్మాయిల చిత్రాలు వ‌చ్చేట్లు.. వాటి కోసం హీరోలిద్ద‌రూ అమీతుమీ తేల్చుకున్న‌ట్లుగా టైటిల్ లోగో డిజైన్ చేయించాడు ఇంద్ర‌గంటి.

దీన్ని బ‌ట్టి ఇది ఇద్ద‌ర‌మ్మాయిల కోసం ఇద్ద‌రు అబ్బాయిల మ‌ధ్య జ‌రిగే పోరు నేప‌థ్యంలో సాగే సినిమా అని అర్థ‌మ‌వుతోంది. త‌న ద‌ర్శ‌క‌త్వంలో వ‌చ్చిన ‘అంత‌కుముందు ఆ త‌రువాత‌’.. ‘బందిపోటు’ సినిమాల్లో క‌థానాయిక‌గా న‌టించిన ఈషాకే ఈ చిత్రంలోనూ హీరోయిన్ గా ఛాన్సిచ్చాడు ఇంద్ర‌గంటి. వెన్నెల కిషోర్ ఓ కీల‌క పాత్ర చేస్తున్నాడు. గ్రీన్ ట్రీ ప్రొడ‌క్ష‌న్స్ బేన‌ర్ మీద న‌ర‌సింహారావు-విన‌య్ ఈ చిత్రాన్ని నిర్మిస్తున్నారు. ఇంద్ర‌గంటి ‘జెంటిల్ మ‌న్ తో ఫామ్ లోకి వ‌చ్చిన మ‌ణిశ‌ర్మే ఈ చిత్రానికి కూడా సంగీతం అందిస్తున్నాడు. మ‌రి అవ‌స‌రాల శ్రీనివాస్.. అడివి శేష్ ఈ చిత్రంలో ఎలా అమీతుమీ తేల్చుకుంటారో.. ప్రేక్ష‌కుల‌కు ఇంద్ర‌గంటి ఈసారి ఎలాంటి వినోదాన్ని పంచుతాడో చూద్దాం.

Like Us on Facebook : https://www.facebook.com/Tupakidotcom/