వాళ్ళ సినిమా పేరు 'సమ్మోహనం'

అన్ని వర్గాలను ఆకట్టుకునే విధంగా సునిశితమైన.. ఆరోగ్యకరమైన కామెడీ ఎంటర్ టెయినర్లను తెరకెక్కించడం డైరెక్టర్ ఇంద్రగంటి మోహనకృష్ణ స్పెషాలిటీ. దాంతోపాటు ఆయన సినిమా టైటిల్స్ కూడా చాలా డిఫరెంట్ గా ఉంటాయి. నానితో తీసిని జెంటిల్ మేన్ మూవీకి మినహా అన్నింటికీ అచ్చ తెలుగు మాటల్లోనే టైటిల్ పెడుతూ వచ్చారు. అష్టాచమ్మా.. అమీతుమీ.. అంతకుముందు.. ఆతరవాత వంటి టైటిల్స్ ఆయన అభిరుచికి అద్దం పడతాయి.

మోహన కృష్ణ లేటెస్ట్ గా సూపర్ స్టార్ ఫ్యామిలీ హీరో సుధీర్ బాబుతో ఓ సినిమా తీస్తున్నాడు. ఈ సినిమా అఫీషియల్ గా కొబ్బరికాయ కూడా కొట్టేశారు. రెగ్యులర్ షూటింగ్ ఇంకా ప్రారంభం కాలేదు. ఈ సినిమాకు మోహన కృష్ణ ఈసారి అచ్చతెలుగు టైటిల్ నే పెట్టాలని అనుకుంటున్నారని తెలుస్తోంది. ఈ మూవీకి సమ్మోహనం అనే టైటిల్ దాదాపుగా ఫిక్సయ్యారని సినిమా యూనిట్ లోని సభ్యుడొకరు తెలిపారు. కామెడీ మిక్స్ డ్ లవ్ స్టోరీగానే ఈ సినిమా ఉంటుందని తెలుస్తోంది. లవ్ స్టోరీలు డీల్ చేయడంలో ఇంద్రగంటి మోహన కృష్ణకు ఓ ప్రత్యేకమైన స్టైల్ ఉంది. ఈ సినిమా కూడా అదే కోవలో ఉంటుందని హీరో సుధీర్ బాబు అంటున్నాడు.

ఈ సినిమాలో హీరోయిన్ గా బాలీవుడ్ హీరోయిన్ అదితిరావ్ హైదరి నటిస్తోంది. బాలీవుడ్ లో బికినీ ఫోజులతో పాపులరయిన ఈ భామ తన హోమ్ సిటీలో చేస్తున్న సినిమాలో మాత్రం చాలా పద్ధతయిన అమ్మాయిగానే కనిపించనుంది. ప్రస్తుతం సుధీర్ బాబు నారా రోహిత్ - శ్రీవిష్ణులతో కలిసి వీరభోగ వసంతరాయలు అనే మల్టీస్టారర్ ఫిలిం కూడా చేస్తున్నాడు.