అక్కినేని కాంపౌండ్లోకి ఇంద్రగంటి

సెన్సిబుల్ సినిమాలతో ఇండస్ట్రీలో తనకంటూ ఓ ప్రత్యేక గుర్తింపు సంపాదించుకున్నాడు ఇంద్రగంటి మోహనకృష్ణ. తన స్థాయిలో సాఫీగా సాగిపోతున్న ఆయన కెరీర్ ‘బందిపోటు’తో పెద్ద కుదుపుకు గురైంది. ఐతే ఆ దెబ్బ నుంచి త్వరగానే కోలుకుని తన ద్వారా హీరోగా పరిచయమైన నానితో కలిసి ‘జెంటిల్‌మన్’ లాంటి మంచి థ్రిల్లర్‌ అందించాడు ఇంద్రగంటి. ఈ సినిమాతో ఇంద్రగంటి దశ తిరిగినట్లే కనిపిస్తోంది. పెద్ద హీరోలు కూడా వైవిధ్యమైన సినిమాల వైపు చూస్తున్న తరుణంలో ఇంద్రగంటి తనేంటో ప్రూవ్ చేసుకుని అందరి కళ్లల్లో పడ్డాడు. ఈ సినిమా ఇంద్రగంటికి పెద్ద అవకాశాన్నే తెచ్చిపెట్టిందన్నది తాజా సమాచారం.

టాలెంట్ ఎక్కడున్నా వెంటనే పసిగట్టే అక్కినేని నాగార్జున ఇంద్రగంటి వర్క్ చూసి ఇంప్రెస్ అయ్యాడట. తన పెద్ద కొడుకు నాగచైతన్యతో ఇంద్రగంటి దర్శకత్వంలో ఓ సినిమా చేయడానికి ఆయన సన్నాహాలు చేస్తున్నట్లు సమాచారం. ప్రస్తుతం చైతూ నెల వ్యవధిలో సాహసం శ్వాసగా సాగిపో.. ప్రేమమ్ సినిమాలతో పలకరించబోతున్నాడు. దీని తర్వాత ‘సోగ్గాడే చిన్నినాయనా’ ఫేమ్ కళ్యాణ్ కృష్ణ దర్శకత్వంలో ఓ సినిమా కమిటయ్యాడు. అది అక్టోబర్లోనే మొదలవుతుంది. నాలుగు నెలల్లోనే పూర్తవుతుంది. ఆ తర్వాత ఇంద్రగంటితో సినిమా ఉండొచ్చని సమాచారం. ముందుగా నాగ్ కు లైన్ చెప్పి మెప్పించిన ఇంద్రగంటి.. చైతూ ఖాళీ అయ్యే సమయానికి పూర్తి స్థాయి స్క్రిప్టుతో రెడీ అవుతాడట.