ఇంద్రగంటి.. ఇంట్రెస్టింగ్ మల్టీస్టారర్

దర్శకుడిగా మొదట్నుంచి విలక్షణమైన సినిమాలే చేస్తూ వస్తున్నాడు ఇంద్రగంటి మోహనకృష్ణ. ఈ క్రమంలో కొన్నిసార్లు మంచి ఫలితాలు అందుకున్నాడు. కొన్నిసార్లు గట్టి ఎదురు దెబ్బలు తిన్నాడు. రెండేళ్ల కిందట ‘బందిపోటు’ అతడికి చేదు అనుభవాన్ని మిగిల్చింది. ఐతే గత ఏడాది ‘జెంటిల్‌మన్’ సినిమాతో మళ్లీ రైజ్ అయ్యాడు ఇంద్రగంటి. ఈ ఊపులో నాగచైతన్య లాంటి పెద్ద హీరోతో సినిమా చేసే అవకాశం లభించింది. వారాహి లాంటి ప్రముఖ ప్రొడక్షన్ హౌజ్ ఈ సినిమాను నిర్మించడానికి ముందుకొచ్చింది. ఈ సినిమా గురించి అనౌన్స్‌మెంట్ కూడా ఇచ్చారు. కానీ ఏమైందో ఏమో ఉన్నట్లుండి ఈ సినిమాకు బ్రేక్ పడింది.

చైతూతో ఇంద్రగంటి సినిమా తాత్కాలికంగా ఆగిందా.. మొత్తంగా ఆపేశారా అన్నది తెలియదు కానీ.. ప్రస్తుతానికి ఇంద్రగంటి వేరే ప్రాజెక్టును పట్టాలెక్కించే పనిలో ఉన్నట్లు సమాచారం. ఇంద్రగంటి ఒక ఇంట్రెస్టింగ్ మల్టీస్టారర్ ప్లాన్ చేస్తున్నాడు. మల్టీస్టారర్ అంటే ఇందులో పెద్ద పెద్ద స్టార్లేమీ నటించట్లేదు. అడివి శేష్ - అవసరాల శ్రీనివాస్ - వెన్నెల కిషోర్ ఇందులో కీలక పాత్రలు పోషిస్తారట. ఇది కచ్చితంగా ఆసక్తి రేకెత్తించే కాంబినేషన్ అనడంలో సందేహం లేదు. ‘క్షణం’తో శేష్ తనకంటూ ఒక ప్రత్యేక గుర్తింపు తెచ్చుకోగా.. మిగతా ఇద్దరూ కామెడీ టైమింగ్ విషయంలో తిరుగులేని నటులుగా పేరు తెచ్చుకున్నారు. ఈ ఆసక్తికర కాంబోలో సినిమా అంటే ముందే అంచనాలు పెరిగిపోతాయి. త్వరలోనే ఈ సినిమా సెట్స్ మీదికి వెళ్తుందని సమాచారం.

Like Us on Facebook : https://www.facebook.com/Tupakidotcom/