నానితో కొత్త జానర్ పరిచయం చేస్తాడట

‘గ్రహణం’ లాంటి జాతీయ అవార్డు సినిమాతో తన పేరు మార్మోగిపోయేలా చేసుకున్నాడు ఇంద్రగంటి మోహనకృష్ణ. ఐతే ఆయన తీసిన రెగ్యులర్ సినిమా ‘మాయాబజార్’ ప్రేక్షకుల్ని ఆకట్టుకోలేదు. ఐతే ఆ తర్వాత ‘అష్టాచెమ్మా’తో తనేంటో రుజువు చేసుకున్నాడు. నాని హీరోగా పరిచయమైంది ఈ సినిమాతోనే. ఆపై గోల్కొండ హైస్కూల్ - అంతకుముందు ఆ తరువాత లాంటి విభిన్నమైన, మంచి సినిమాలతో మెప్పించాడు ఇంద్రగంటి. తన సినిమాలంటే ఏదో ఒక వైవిధ్యం ఉంటుందని ఆశించే ప్రేక్షకుల్ని ‘బందిపోటు’తో తీవ్రంగా నిరాశ పరిచాడతను.

బందిపోటు మరీ రొటీన్ గా ఉండి ప్రేక్షకుల్ని ఆకట్టుకోలేకపోయింది. ఐతే వైవిధ్యమే తన తెలుసుకున్న ఇంద్రగంటి ఈసారి సరికొత్త ప్రయోగానికే సిద్ధమవుతున్నాడు. నానితో తాను తీయబోయే తర్వాతి సినిమా టాలీవుడ్ లో సరికొత్త జానర్ అవుతుందని అంటున్నాడు ఇంద్రగంటి. ఓ ఇంటర్వ్యూ లో ఇంద్రగంటి మాట్లాడుతూ.. ‘‘నా తర్వాతి సినిమా తెలుగులో ఇంతకుముందు ఎన్నడూ చూడని లవ్ స్టోరీ. థ్రిల్లింగ్ ఎలిమెంట్స్ తో పాటు కామెడీ కూడా ఉంటుంది. ఇది తెలుగులో సరికొత్త జానర్ అవుతుందని అనుకుంటున్నా. నా కెరీర్ లో బిగ్గెస్ట్ బడ్జెట్ మూవీ కూడా ఇదే’’ అని చెప్పాడు. ‘బీరువా’ ఫేమ్ సురభి ఇందులో నానికి జంటగా నటించబోతోంది.