తరగని గ్లామర్ తో జోరు పెంచుతున్న 'ఖడ్గం' సంగీత!

సంగీత పేరు వినగానే 'ఖడ్గం' సినిమాలో 'ఒకే ఒక్క ఛాన్స్ ప్లీజ్' అంటూ సినిమా ఆఫీసుల చుట్టూ తిరిగే పల్లెటూరి పిల్ల పాత్ర కళ్ల ముందు కదలాడుతుంది. అమాయకంగా కనిపించే సీతాలక్ష్మి పాత్రకి సంగీత జీవం పోసింది. అంతకుముందు సంగీత ఒకటి రెండు సినిమాల్లో చేసినప్పటికీ, 'ఖడ్గం' సినిమాతోనే ఆమె అందరి దృష్టిలో పడింది. ఈ సినిమాతోనే ఆమె కెరియర్ మలుపు తిరిగింది. ఇక అక్కడి నుంచి తెలుగులో ఆమె అవకాశాల కోసం వెతుక్కోలేదు. ఆమె ఆసక్తిని చూపుతున్నంత వరకూ అవకాశాలు వస్తూనే ఉన్నాయి.

'ఈ అబ్బాయి చాలా మంచోడు' .. 'సంక్రాంతి' వంటి సినిమాలు సంగీతలోని నటిని పూర్తిస్థాయిలో ఆవిష్కరించాయి. మంచి ఎత్తు .. చక్కని రంగు .. అందుకు తగిన ఆకర్షణీయమైన రూపంతో సంగీత ఆకట్టుకుంది. అప్పట్లో ఆమెను అభిమానించేవారు .. ఆరాధించేవారి సంఖ్య ఎక్కువే. అలాంటి సంగీత 2010 తరువాత తమిళ సినిమాలు ఎక్కువగా చేస్తూ వెళ్లింది. ఈ గ్యాప్ లో ఆమె ఒక్క తెలుగు సినిమా కూడా చేయకపోవడం విశేషం. మళ్లీ ప్రేక్షకులు ఆమెను తెరపై చూసింది 'సరిలేరు నీకెవ్వరు' సినిమాలోనే.

ఈ సినిమాతోనే విజయశాంతి రీ ఎంట్రీ ఇవ్వడంతో అందరి దృష్టి అటువైపే వెళ్లింది. కానీ సంగీత కూడా చాలా కాలం తరువాత ఈ సినిమాలో కనిపించింది. రావు రమేశ్ భార్య పాత్రలో ఆమె ప్రేక్షకులను నవ్వించింది. సంగీతలో గ్లామర్ ఎంత మాత్రం తగ్గకపోవడం అందరినీ ఆశ్చర్యపరిచింది. అందువల్లే ఇప్పుడు ఆమెకి వరుసగా అవకాశాలు వస్తున్నాయని అంటున్నారు. 'ఆచార్య' సినిమాలోనూ ఆమె ఒక ముఖ్యమైన పాత్రలో కనిపించనుంది. మరో రెండు మూడు ప్రాజెక్టులలో ఆమె పేరు వినిపిస్తోంది. చూస్తుంటే సంగీత తన జోరు పెంచుతున్నట్టే అనిపిస్తోంది.