ఇంట్రస్టింగ్ గా ఎంఎస్ రాజు 'సతి' ఫస్ట్ లుక్..!!

ఎన్నో విజయవంతమైన చిత్రాలు నిర్మించిన సీనియర్‌ ప్రొడ్యూసర్ ఎమ్మెస్‌ రాజు.. చాలా గ్యాప్ తర్వాత ద‌ర్శ‌కుడిగా 'డ‌ర్టీ హ‌రి' అనే సినిమాను తెరకెక్కించిన సంగతి తెలిసిందే. డైరెక్షన్‌ లో ఆయన ఆసక్తి మరియు ప్రతిభను అన్వేషిస్తూ.. సుమంత్ ఆర్ట్ ప్రొడక్షన్స్ సమర్పణలో బ్యాక్ టు బ్యాక్ న్యూ ఏజ్ చిత్రాలతో వస్తున్నారు.

'డర్టీ హరి' చిత్రంతో సక్సెస్ అందుకున్న MS రాజు.. దీని తర్వాత '7 డేస్ 6 నైట్స్' అనే యూత్‌ ఫుల్ రొమాంటిక్ ఎంటర్టైనర్ ను తెరకెక్కించిన సంగతి తెలిసిందే. పోస్ట్ ప్రొడక్షన్ పూర్తి చేసుకున్న ఈ సినిమా రిలీజ్ కు రెడీగా ఉంది. ఈ క్రమంలో మదర్స్ డే సందర్భంగా ఎమ్మెస్ రాజు ''సతి'' అనే పవర్ ఫుల్ టైటిల్ తో తన కొత్త చిత్రాన్ని ప్రకటించారు.

నేడు మెగా ఫిల్మ్ మేకర్ ఎంఎస్ రాజు పుట్టినరోజు సందర్భంగా, ''సతి'' ఫస్ట్ లుక్ పోస్టర్ ను ఆవిష్కరించారు. ప్రీ లుక్ లో ముఖాలు కనిపించకుండా ఓ యువ జంట ఇంట్లో అడుగుపెడుతున్నట్లు చూపించగా.. తాజాగా ఫస్ట్ లుక్ పోస్టర్ లో ప్రధాన జంటను రివీల్ చేశారు.

'సతి' సినిమాలో దర్శక నిర్మాత తనయుడు సుమంత్ అశ్విన్ హీరోగా.. మెహెర్ చాహల్ హీరోయిన్ గా నటిస్తున్నారు. జాతర బ్యాక్ డ్రాప్ లో సెట్ చేయబడిన ఫస్ట్ లుక్ పోస్టర్ లో.. మెహెర్ సుమంత్ అశ్విన్ చేయి పట్టుకొని నడవడం కనిపిస్తుంది.

టైటిల్ అండ్ ఫస్ట్ లుక్ చూస్తుంటే.. ప్రేమ - పెళ్లి - వివాహ బంధం నేపథ్యంలో 'సతి' సినిమాను తెరకెక్కిస్తున్నారని అనిపిస్తోంది. అలానే ఈ చిత్రంతో తనయుడిని హీరోగా నిలబెట్టాలని ఫిక్స్ అయినట్లు తెలుస్తోంది. గత రెండు చిత్రాలను బోల్డ్ గా రూపొందించిన ఎంఎస్ రాజు.. మరి ఈసారి ఎలాంటి కంటెంట్ తో రాబోతున్నాడో చూడాలి.

ఉత్కంఠభరితమైన చిత్రంగా పేరుగాంచిన 'సతి' షూటింగ్ శరవేగంగా జరుగుతోంది. ఇందులో సీనియర్ నటుడు నరేష్ ప్రత్యేక పాత్రలో నటిస్తున్నారు. ఎంఎస్ రాజు దర్శకత్వంలో సుమంత్ ఆర్ట్ ప్రొడక్షన్స్ సమర్పణలో ఈ చిత్రాన్ని రూపొందిస్తున్నారు.

వైల్డ్ హానీ ప్రొడక్షన్ మరియు రామంత్ర క్రియేషన్స్ బ్యానర్స్ పై సుమంత్ అశ్విన్ - రఘురామ్ టి - సారంగ సురేష్ కుమార్ - డాక్టర్ రవి దాట్ల కలిసి సంయుక్తంగా ఈ చిత్రాన్ని నిర్మిస్తున్నారు. జె శ్రీనివాస రాజు కో ప్రొడ్యూసర్ గా వ్యవహరిస్తున్న ఈ సినిమాకు జునైద్ సిద్ధిఖీ ఎడిటర్ గా వర్క్ చేస్తున్నారు. త్వరలోనే 'సతి' సినిమాకు సంబంధించిన ఇతర వివరాలు వెల్లడి కానున్నాయి.