'ఉమ' చిత్రం నుంచి కాజల్ షేర్ చేసిన ఆసక్తికరమైన పోస్టర్..!

దక్షిణాది స్టార్ హీరోయిన్లలో ఒకరైన కాజల్ అగర్వాల్.. సినిమా ఇండస్ట్రీకి వచ్చి 16 ఏళ్లైనా కూడా ఇప్పటికీ అదే జోరు చూపిస్తోంది. ప్రస్తుతం ఆమె నటిస్తునన్న బాలీవుడ్ మూవీ ''ఉమ''. పెళ్లి తర్వాత కాజల్ ఓకే చేసిన ఫస్ట్ హిందీ సినిమా ఇది. ఇప్పటికే ఆమె పాత్రకు సంబంధించిన షూటింగ్ పూర్తి చేసింది. అయితే మంగళవారం సోషల్ మీడియా వేదికగా ఉమా చిత్రం నుంచి ఓ ఆసక్తికరమైన పోస్టర్ ని కాజల్ షేర్ చేసింది.

'ఉమ' పోస్టర్‌ లో బ్యూటిఫుల్ కాజల్ అగర్వాల్ ఒక పక్క గ్రామో ఫోన్.. మరోపక్క ఓ గొడుగు మధ్యలో స్టైల్ గా నిలబడి ఉంది. కాళ్ళ వద్ద కాగితంతో చేసిన బొమ్మలు కనిపిస్తున్నారు. అంతేకాదు ఆమె వెనుక ఉన్న బోర్డుపై ఏడుగురి ఫొటోలు పిన్ చేయబడి ఉన్నాయి. ఈ చిత్రంలో టిన్ను ఆనంద్ - మేఘనా మాలిక్ - హర్ష్ ఛాయా - గౌరవ్ శర్మ - శ్రీశ్వర - అయోషి తాలుక్దార్ మరియు కియాన్ శర్మ తదితరులు ఇతర ప్రధాన పాత్రలు పోషించినట్లు తెలుస్తోంది.

ఉమా అనే అపరిచితురాలు ఓ పెళ్లి ఇంట్లోకి వెళ్లిన తర్వాత.. అక్కడ ఎలాంటి పరిణామాలు చోటు చేసుకున్నాయనే కాన్సెప్ట్ తో ఈ సినిమా తెరకెక్కుతోంది. ఇందులో కాజల్ ఉమా పాత్రలో కనిపించనుంది. నూతన దర్శకుడు తథాగత సింఘా ఈ చిత్రానికి దర్శకత్వం వహిస్తున్నారు. మిరాజ్ క్రియేషన్స్ సమర్పణలో AVMA మీడియా సంస్థ ఈ చిత్రాన్ని నిర్మిస్తోంది. మంత్రరాజ్ పలివాల్ - అవికేష్ ఘోష్ - మనీషా దీనికి నిర్మాతలు. ప్రముఖ దర్శకుడు సుజోయ్ ఘోష్ ఈ మూవీకి క్రియేటివ్ ప్రొడ్యూసర్ గా వ్యవహరిస్తున్నారు. 'ఉమ' చిత్రం త్వరలోనే ప్రేక్షకుల ముందుకు రానుంది.

ఇకపోతే కాజల్ అగర్వాల్ హీరోయిన్ గా నటిస్తున్న 'ఆచార్య' 'హే సినామిక' సినిమాల షూటింగ్స్ కూడా ఇప్పటికే పూర్తి చేశారు. మెగాస్టార్ చిరంజీవి తో కలిసి చేస్తున్న 'ఆచార్య' సినిమా వచ్చే ఏడాది ఫిబ్రవరి 4న విడుదల కానుంది. ఇదిలా ఉంటే అందాల చందమామ కాజల్ కు పెళ్ళైనప్పటికీ.. ప్రెగ్నెంట్ అని వార్తలు వస్తున్నా ఫ్యాన్ ఫాలోయింగ్ ఏమాత్రం తగ్గలేదని అర్థం అవుతోంది. సోషల్ మీడియాలో బాగా యాక్టివ్ గా ఉండే కాజల్.. ఇన్‌స్టాగ్రామ్ లో 20 మిలియన్ ఫాలోవర్స్ మార్క్‌ ను అందుకుంది.