'మహేష్ - త్రివిక్రమ్' సినిమాపై ఇంట్రెస్టింగ్ అప్డేట్..?

సూపర్ స్టార్ మహేష్ బాబు మరియు స్టార్ డైరెక్టర్ త్రివిక్రమ్ శ్రీనివాస్ కాంబోలో SSMB28 చిత్రం తెరకెక్కుతున్న సంగతి తెలిసిందే. గతంలో 'అతడు' 'ఖలేజా' చిత్రాలకు కలిసి పని చేసిన ఈ ఇద్దరూ.. దాదాపు పుష్కర కాలం తర్వాత మళ్ళీ చేతులు కలపడంతో సినీ అభిమానుల్లో భారీ అంచనాలు ఏర్పడ్డాయి.

మహేష్ - త్రివిక్రమ్ కాంబినేషన్ లో ఓ హై వోల్టేజ్ యాక్షన్ ఎంటర్‌టైనర్ రాబోతున్నట్లు నిర్మాతలు మొదటి నుంచీ చెబుతూ వస్తున్నారు. దీనికి తగ్గట్టుగానే ఓ ఇంటెన్స్ యాక్షన్ సీక్వెన్స్ షూట్ తో ఫస్ట్ షెడ్యూల్ ని పూర్తి చేశారు. అయితే స్క్రిప్ట్ మొత్తం చేంజ్ అయినట్లుగా రూమర్స్ వినిపిస్తున్నాయి.

త్రివిక్రమ్ చెప్పిన ఫైనల్ డ్రాఫ్ట్‌ స్క్రిప్ట్ మహేష్ కి నచ్చలేదని.. దీంతో దర్శకుడు మార్పులు చేర్పులు చేసి హీరోని ఒప్పించారని అంటున్నారు. మొదట అనుకున్న సబ్జెక్ట్ లో ఫుల్ యాక్షన్ ఉండగా.. ఇప్పుడు మాత్రం బలమైన ఎమోషనల్ డ్రామాతో కూడిన ఫ్యామిలీ ఎంటర్‌టైనర్‌ స్క్రిప్ట్ ని రెడీ చేసినట్లుగా టాక్.

త్రివిక్రమ్ ఇప్పటి వరకూ ఎమోషన్ - రొమాన్స్ కలబోసిన ఫ్యామిలీ డ్రామాలతోనే హిట్లు కొడుతూ వచ్చారు. అది ఆయన బలమని అనుకోవాలి. ఇప్పుడు మహేష్ సైతం దర్శకుడితో అలాంటి సినిమానే చేయాలనీ కోరుకుంటున్నాడట. అందులోనూ రాజమౌళి తో 'ఇండియానా జోన్స్' తరహా యాక్షన్ అడ్వెంచర్ మూవీ చేయాల్సి ఉంది.

గ్లోబ్ ట్రాటింగ్ మూవీ SSMB29 కంటే ముందు త్రివిక్రమ్ తో ఓ ఎమోషనల్ ఫ్యామిలీ డ్రామా చేయాలని భావించారట. అందుకే స్క్రిప్ట్ లో మార్పులు సూచించినట్లుగా చెబుతున్నారు. ఇటీవల హాలిడే నుంచి తిరిగొచ్చిన సూపర్ స్టార్ కు ఫైనల్ స్క్రిప్ట్ నేరేషన్ ఇచ్చేశారని తెలుస్తోంది.

మహేష్ సైడ్ నుంచి గ్రీన్ సిగ్నల్ రావడంతో సెట్స్ మీదకు వెళ్ళడానికి రెడీ అయ్యారు. డిసెంబర్ మొదటి వారం తర్వాత షూటింగ్ మొదలు పెట్టాలని భావించగా.. లెజండరీ నటుడు కృష్ణ మరణం కారణంగా వాయిదా పడిందని టాక్ వినిపిస్తోంది.

ఇక ప్రధాన నటీనటులు మరియు సాంకేతిక నిపుణులు కూడా మారబోతున్నట్లుగా చెప్పుకున్నారు. హీరోయిన్ పూజా హెగ్డే మరియు మ్యూజిక్ డైరెక్టర్ ఎస్ థమన్ లను మార్చాలని చూస్తున్నారని రూమర్స్ వచ్చాయి. అయితే వాళ్లనే కొనసాగించే అవకాశం ఉందని ఇప్పుడు లేటెస్ట్ టాక్.

త్రివిక్రమ్ డైరెక్ట్ చేసిన 'అరవింద సమేత వీర రాఘవ' 'అల వైకుంఠపురములో' వంటి బ్యాక్ టూ బ్యాక్ హిట్స్ లో భాగమైన పూజా - థమన్ లను మార్చబోరని అంటున్నారు. కాకపోతే విలన్ పాత్ర కోసం ముందుగా అనుకున్నవారిని కాకుండా ఇప్పుడు వేరే యాక్టర్ కోసం ట్రై చేస్తున్నారని అంటున్నారు.

మహేష్ బాబు సినిమాలో ప్రతినాయకుడిగా బాలీవుడ్ హీరో విక్కీ కౌషల్ ను తీసుకోవాలని త్రివిక్రమ్ ఆలోచిస్తున్నారని ఓ రూమర్ చక్కర్లు కొడుతోంది. ఇదొక స్టైలిష్ విలన్ రోల్ అని.. దీనికి విక్కీ అయితే బాగుంటుందని భావిస్తున్నారట. మరి విక్కీ కౌషల్ నెగెటివ్ క్యారక్టర్ చేయడానికి ఒప్పుకుంటాడా? అసలు ఈ వార్తల్లో నిజమెంత? అనేది తెలియాలంటే ఇంకొన్నాళ్ళు ఆగాల్సిందే.

SSMB28 చిత్రాన్ని హారిక అండ్ హాసిని క్రియేషన్స్ బ్యానర్ పై రాధాకృష్ణ (చినబాబు) భారీ బడ్జెట్ తో ప్రతిష్టాత్మకంగా నిర్మించనున్నారు. ముందుగా వచ్చే సమ్మర్ సీజన్ లో రిలీజ్ చేయబోతున్నట్లు ప్రకటించబడిన ఈ క్రేజీ ప్రాజెక్ట్.. పరిస్థితులను బట్టి 2023 దసరా సందర్భంగా విడుదల చేసే అవకాశం ఉందని టాక్ నడుస్తోంది.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.