'ఇంకొక్కడు'గా వస్తానంటున్న అపరిచితుడు

చియాన్ విక్రమ్ ను టాలీవుడ్ లో కూడా స్టార్ చేసేసింది అపరిచితుడు మూవీ. కానీ ఆ తర్వాత ఇప్పటివరకూ ఆ స్థాయిలో విజయం సాధించడం మాత్రం విక్రమ్ వల్ల కాలేదు. పైగా ఈ వెర్సటైల్ హీరో నటించిన సినిమాలు ఈ మధ్య వరుసగా డిజాస్టర్లుగా మిగులుతున్నాయి.

ఎన్నో ఆశలు పెట్టుకున్న శంకర్ మూవీ ఐ అయితే ఘోరంగా నిరుత్సాహపరించింది. ఆ తర్వాత వచ్చిన 10 ఎన్రాదుకుళ్ల డిజాస్టర్ గా మిగిలింది. సమంత హీరోయిన్ గా నటించిన ఈ సినిమాని తెలుగులో డబ్బింగ్ కూడా చేయలేదు. దీంతో టాలీవుడ్ లో బాగా వెనకబడిపోయాడు విక్రమ్. అందుకే గతంలో చేసిన పొరపాట్లను ఈసారి సరిదిద్దుకుంటున్నాడు ఈ హీరో. ప్రస్తుతం ఇరుమగన్ అనే మూవీలో నటిస్తున్న విక్రమ్.. ఈ సినిమాని తెలుగులో కూడా ఒకేసారి రిలీజ్ చేసేలా ప్లాన్ చేసుకున్నాడు. ప్రస్తుతానికి ఇరుమగన్ 60శాతం షూటింగ్ ను పూర్తి చేసుకుంది.

ఇప్పటికే తెలుగు వెర్షన్ కు పనులు కూడా మొదలైపోయాయి. ఇరుమగన్ తెలుగు వెర్షన్ కు 'ఇంకొక్కడు' అనే టైటిల్ ని ఫైనల్ చేశారు. ఈ మూవీలో నయనతార, నిత్యా మీనన్ లు హీరోయిన్ లు గా నటించడం.. వీరిద్దరికీ టాలీవుడ్ టాప్ హీరోయిన్ ఇమేజ్ ఉండడంతో.. ఇక్కడ ఇంకొక్కడు బాగానే పెర్ఫామ్ చేసే అవకాశాలున్నాయి. ఏళ్ల తరబడి హిట్ కోసం పడిగాపులు పడుతున్న విక్రమ్ కు.. ఇంకొక్కడు రిలీఫ్ ఇస్తుందేమో చూడాలి.