బాల‌య్య‌తో అనిల్ రావిపూడి రిస్క్ చేస్తున్నాడా?

చాలా రోజుల త‌రువాత `అఖండ‌` మూవీతో మ‌ళ్లీ ట్రాక్ లోకి వ‌చ్చారు హీరో నంద‌మూరి బాల‌కృష్ణ‌. గ‌త ఏడాది డిసెంబ‌ర్ లో వ‌చ్చిన ఈ సినిమా బాక్సాఫీస్ వ‌ద్ద భారీ విజ‌యాన్ని సాధించ‌డంతో పాటు రికార్డు స్థాయి వ‌సూళ్ల‌ని రాబ‌ట్టింది. బోయ‌పాటి శ్రీ‌ను డైరెక్ట్ చేసిన ఈ చిత్రం మ‌ర‌పురాని హిట్ ని అందించి చాలా కాలంగా స‌రైన హిట్ లేక వెన‌క‌బ‌డిన బాల‌య్య ని మ‌ళ్లీ ట్రాక్ లోకి తీసుకొచ్చింది. ఈ మూవీ ఇచ్చిన స‌క్సెస్ ఆనందంలో వున్న బాల‌య్య రెట్టించిన ఉత్సాహంతో మ‌రో యాక్ష‌న్ ఎంట‌ర్ టైన‌ర్ లో న‌టిస్తున్నారు.

`క్రాక్‌` మూవీ బ్లాక్ బ‌స్ట‌ర్ తో ట్రాక్ లోకొచ్చిన ద‌ర్శ‌కుడు గోపీచంద్ మ‌లినేని ఈ మూవీని తెర‌కెక్కిస్తున్నారు. మైత్రీ మూవీ మేక‌ర్స్ బ్యాన‌ర్ పై ఈ మూవీని అత్యంత భారీ స్థాయిలో నిర్మిస్తున్నారు.

క్రేజీ హీరోయిన్ శృతిహాస‌న్ ఈ మూవీలో బాల‌య్య‌కు జోడీగా క‌నిపించ‌బోతోంది. ప్ర‌స్తుతం షూటింగ్ ద‌శ‌లో వున్న ఈ మూవీకి సంబంధించిన టీజ‌ర్ ని ఫ‌స్ట్ హంట్ పేరుతో ఇటీవ‌ల బాల‌య్య పుట్టిన రోజు సంద‌ర్భంగా ఒక రోజు ముందే విడుద‌ల చేశారు.

ఈ మూవీ త‌రువాత బాల‌య్య 108 ప్రాజెక్ట్ ని బ్లాక్ బ‌స్ట‌ర్ డైరెక్ట‌ర్ గా పేరు తెచ్చుకున్న అనిల్ రావిపూడి తెర‌పైకి తీసుకురాబోతున్నారు. ఈ మూవీలో బాల‌య్య 50 ఏళ్లు దాటిన ప‌వ‌ర్ ఫుల్ పోలీస్ ఆఫీస‌ర్ గా క‌నిపిస్తార‌ని వార్త‌లు వినిపిస్తున్నాయి. అత‌నికి కూతురుగా `పెళ్లి సంద‌D` ఫేమ్ శ్రీ‌లీల న‌టిస్తుంద‌ని కూడా ప్ర‌చారం మొద‌లైంది. భారీ బ‌డ్జెట్ తో ఓ భారీ నిర్మాణ సంస్థ ఈ మూవీని త్వ‌ర‌లోనే తెర‌పైకి తీసుకురానుంద‌ని తెలిసింది.

ఇదిలా వుంటే ఈ చిత్రానికి సంబంధించిన ఆస‌క్తిక‌ర‌మైన వార్త ఒక‌టి చక్కర్లు కొడుతోంది. ఆఖండ త‌రువాత చేస్తున్న గోపీ చంద్ మ‌లినేని మూవీ కూడా సీరియ‌స్ యాక్ష‌న్ మూవీ కావ‌డంతో అనిల్ రావిపూడి తో చేయ‌నున్న చిత్రాన్ని కామెడీ ఎంట‌ర్ టైన‌ర్ గా చేయాల‌ని భావిస్తున్నార‌ని ఓ వార్త ఫిల్మ్ స‌ర్కిల్స్ లో చ‌క్క‌ర్లు కొడుతోంది.

గ‌తంలో బాల‌య్య కామెడీ ప్ర‌ధానంగా చేసిన గొప్పింటి అల్లుడు, భ‌లే వాడివి బాసు వంటి చిత్రాలు చేశారు. ఇవి డిజాస్ట‌ర్ లు అయ్యాయి. దీంతో అనిల్ రావిపూడితో బాల‌య్య కామెడీ సినిమా చేయ‌బోతున్నాడ‌న‌గానే ఫ్యాన్స్ కంగారు ప‌డుతున్నార‌ట‌. రిస్క్ చేస్తున్నాడా? అని భ‌య‌ప‌డుతున్నార‌ని వార్త‌లు వినిపిస్తున్నాయి.