'మోసగాళ్ళు' స్క్రిప్ట్ రైటర్ అతనేనా..?

డైనమిక్ హీరో మంచు విష్ణు నటిస్తున్న లేటెస్ట్ యాక్షన్ ఎంటర్టైనర్ ''మోసగాళ్ళు''. ఏవీఏ ఎంటర్‌టైన్మెంట్ మరియు 24 ఫ్రేమ్స్ ఫ్యాక్టరీ బ్యానర్లపై మంచు విష్ణు ఈ చిత్రాన్ని భారీ బడ్జెట్ తో నిర్మించారు. హాలీవుడ్ డైరెక్టర్ జెఫ్రీ గీ చిన్ దర్శకత్వం వహించిన ఈ చిత్రం రేపు ప్రేక్షకుల ముందుకు రానుంది. ఈ నేపథ్యంలో ఇంతకముందు చేయని విధంగా విష్ణు ఈ సినిమాని ప్రమోట్ చేస్తున్నారు. వాస్తవ ఘటనల ఆధారంగా ఐటీ స్కామ్‌‌ నేపథ్యంలో తెరకెక్కించాం అని చెప్తున్న ఈ చిత్రానికి స్టోరీ ఎవరు అందించారనేది ఆసక్తికరంగా మారింది.

ఈ సినిమా కోసం హాలీవుడ్ నుంచి డైరెక్టర్ ని తీసుకొచ్చిన విష్ణు.. 'మోసగాళ్ళు' చిత్రానికి స్వయంగా స్క్రిప్ట్ అందించారట. ప్ర‌పంచంలోనే అతి పెద్ద ఐటీ స్కామ్ గురించి తెలుసుకుని విష్ణు కథ రెడీ చేసుకున్నారట. దీనికి ప్రస్తుతం మోహన్ బాబు తో 'సన్ ఆఫ్ ఇండియా' సినిమాని డైరెక్ట్ చేస్తున్న డైమండ్ ర‌త్న‌బాబు హెల్ప్ తీసుకున్నాడట. అయితే ఇప్పటి వరకు విడుదలైన ప్రమోషనల్ కంటెంట్ లో ఎక్కడా రైటర్ గా విష్ణు పేరు కనిపించలేదు. మరి సినిమా టైటిల్ కార్డ్ లో రచయితగా విష్ణు పేరు పడుతుందేమో చూడాలి. ఈ చిత్రాన్ని తెలుగు - ఇంగ్లీష్ భాషలోనే తీయాలని అనుకున్నప్పటికీ.. యూనివర్సల్ కాన్సెప్ట్ కావడంతో పాన్ ఇండియా మూవీగా రూపొందించారని తెలుస్తోంది.

ఏదేమైనా సాలిడ్ హిట్ కోసం ఎదురుచూస్తున్న మంచు విష్ణు.. కథను నమ్మి భారీ బడ్జెట్ తో అన్నీ తానై 'మోసగాళ్ళు' సినిమాని తెరకెక్కించారు. ఇందులో విష్ణు అక్కగా స్టార్ హీరోయిన్ కాజల్ అగర్వాల్ నటించగా.. పవర్ ఫుల్ పోలీస్ ఆఫీసర్ పాత్రలో బాలీవుడ్ నటుడు సునీల్ శెట్టి నటించారు. రుహీ సింగ్ - నవీన్ చంద్ర - నవదీప్ ఇతర ముఖ్య పాత్ర పోషించారు. మరి కొన్ని గంటల్లో ప్రేక్షకుల ముందుకు రానున్న 'మోసగాళ్ళు' మంచు విష్ణు కు ఏ స్థాయి విజయాన్ని అందిస్తుందో చూడాలి.