'ఘోస్ట్' మూవీలో హీరోయిన్ గా కాజల్ ఫస్ట్ ఛాయిస్ కాదా..??

కింగ్ అక్కినేని నాగార్జున - డైరెక్టర్ ప్రవీణ్ సత్తారు కాంబినేషన్ లో ''ఘోస్ట్'' అనే హై ఆక్టేన్ యాక్షన్ థ్రిల్లర్ తెరకెక్కుతున్న సంగతి తెలిసిందే. ఇందులో నాగ్ రా ఏజెంట్ గా కనిపించబోతున్నారు. ఇది ఎంటర్టైనింగ్ అండ్ యాక్షన్ ప్యాక్డ్ రోల్ అని చిత్ర వర్గాలు చెబుతున్నాయి. ఇటీవల విడుదల చేసిన టైటిల్ అండ్ ఫస్ట్ లుక్ మోషన్ పోస్టర్ కు విశేష స్పందన లభించింది. ఇందులో నాగార్జున సరసన కాజల్ అగర్వాల్ హీరోయిన్ గా నటిస్తోంది. ఇది వీరి కాంబోలో వస్తున్న ఫస్ట్ సినిమా. నాగ్ తో పాటుగా కాజల్ కూడా ఈ చిత్రంలో ఫైట్స్ చేయనుంది. ఆమె ఇంతకుముందు చేయని సరికొత్త పాత్ర పోషిస్తోంది. అయితే ఈ సినిమాలో హీరోయిన్ గా ఫస్ట్ ఛాయిస్ కాజల్ అగర్వాల్ కాదని తెలుస్తోంది.

'ఘోస్ట్' సినిమాలో నాగార్జున కు జోడీగా ముందుగా గోవా బ్యూటీ ఇలియానా ను అనుకున్నారు. దీనికి ఇల్లీ బేబీ సైడ్ నుంచి గ్రీన్ సిగ్నల్ కూడా వచ్చిందట. అయితే ఎందుకనో చివరకు ఇలియానాను కాదనికాజల్ అగర్వాల్ కు ఈ ఆఫర్ ఇచ్చినట్లుగా తెలుస్తోంది. గతంలో నాగ్ - లారెన్స్ కలయికలో వచ్చిన 'డాన్' సినిమాలో ముందుగా ఇలియానా నే హీరోయిన్ గా అనుకున్నారు. కానీ చివరకు అనుష్క ను ఫైనలైజ్ చేశారు. ఇప్పుడు 'ఘోస్ట్' అవకాశం కూడా గోవా బ్యూటీ చేజారి కాజల్ చేతికి వచ్చిందట. ఇలియానా చివరిగా తెలుగులో 'అమర్ అక్బర్ ఆంటోని' సినిమాలో నటించింది. ఈ సినిమా ఆశించిన స్థాయిలో విజయం సాధించకపోవడంతో ఆ తర్వాత మళ్ళీ తెలుగు సినిమాలో కనిపించలేదు.

ఇదిలా ఉండగా 'ఘోస్ట్' సినిమా నుంచి కాజల్ అగర్వాల్ తప్పుకోనుందని టాక్ నడుస్తోంది. గౌతమ్ కిచ్లు ని వివాహం చేసుకున్న కాజల్ ప్రస్తుతం ప్రెగ్నెంట్ అని.. ఆ కార‌ణంతోనే సినిమాలో న‌టించ‌డం లేద‌ని గత కొన్ని రోజులుగా వార్తలు వస్తున్నాయి. ఇందులో నిజమెంతో తెలియాలంటే ఇంకొన్నాళ్లు ఆగాల్సిందే. ఇకపోతే 'గోస్ట్' సినిమా షూటింగ్ ప్రస్తుతం హైదరాబాద్ పరిసర ప్రాంతాల్లో జరుగుతోంది. ఇండియాలోని ప్రధాన నగరాలతో పాటుగా విదేశాలలో ఈ సినిమాలోని కీలకమైన సన్నివేశాల చిత్రీకరణ ప్లాన్ చేస్తున్నారు.

సోనాలి నారంగ్ సమర్పణలో శ్రీ వెంకటేశ్వర సినిమాస్ ఎల్ఎల్పి మరియు నార్త్ స్టార్ ఎంటర్టైన్మెంట్ ప్రై.లి బ్యానర్స్ పై ఈ సినిమా రూపొందుతోంది. నారాయణ్ దాస్ కె నారంగ్ - పుష్కర్ రామ్మోహనరావు - శరత్ మరార్ సంయుక్తంగా ఈ చిత్రాన్ని నిర్మిస్తున్నారు. ఇందులో గుల్ పనాంగ్ - అనైకా సురేంద్రన్ కీలక పాత్రల్లో నటిస్తున్నారు. ఈ చిత్రానికి ముఖేష్.జి సినిమాటోగ్రఫీ అందిస్తుండగా.. బ్రహ్మ కడలి ఆర్ట్ డైరెక్టర్ గా వర్క్ చేస్తున్నారు. రాబిన్ సుబ్బు మరియు నభా మాస్టర్ యాక్షన్ కొరియోగ్రఫీ చేస్తున్నారు. 'ఘోస్ట్' సినిమా వచ్చే ఏడాది ప్రేక్షకుల ముందుకు రానుంది.