మెగా-నందమూరి మల్టీస్టారర్ లేనట్టే?

టాలీవుడ్ ఒక భారీ మల్టి స్టారర్ సినిమాను చూసి చాలా కాలమే అవుతోంది. మొన్నటి వరకు కొన్ని కథలు వస్తున్నాయని చెబుతున్నా వేటిపై అంతగా క్లారిటీ రాలేదు. అయితే గత కొంత కాలంగా మెగా నందమూరి మల్టి స్టారర్ తెగ ఊరిస్తోంది. కాన్సెప్ట్ పుట్టి ఏడాది కావొస్తోంది కానీ కథ మాత్రం పూర్తి అవ్వలేదు. రీసెంట్ గా పూర్తయ్యింది అని టాక్ వచ్చినా అది కూడా అబద్దమే అని తేలింది.

మెగా హీరో సాయి ధరమ్ తేజ్ - కళ్యాణ్ రామ్ కాంబినేషన్ లో ఏఎస్ రవి కుమార్ చౌదరి డైరెక్షన్లో ఒక సినిమా ఉంటుందని చెప్పారు. పిల్లా నువ్వు లేని జీవితం సినిమాతో సాయి ధరమ్ తేజ్ కి మంచి హిట్ ఇచ్చిన చౌదరి ఆ తర్వాత సాయికి మల్టి స్టారర్ కాన్సెప్ట్ చెప్పడంతో ఒకే అన్నాడు. మరో హీరోగా కళ్యాణ్ రామ్ ని అనుకున్నారు. అతను కూడా ఒకే అన్నాడు. ఇక నిర్మాత కెఎస్ రామారావు కూడా ప్రాజెక్ట్ ని నిర్మించేందుకు రెడీ అయ్యారు.

కానీ దర్శకుడి కథనంలో తేడా రావడంతో ఆ తర్వాత కళ్యాణ్ రామ్ ఒప్పుకోలేదట. చాలాసార్లు చేంజ్ చేసినా కూడా నో అనే చెబుతున్నాడట. ఇక సాయి ధరమ్ తేజ్ కూడా పట్టించుకోవడం మానేసినట్లు తెలుస్తోంది. నిర్మాత కెఎస్ రామారావు కూడా పట్టించు కోవడం లేదని ఫిల్మ్ నగర్ లో టాక్ వినిపిస్తోంది. మరి ఇది ఎంతవరకు నిజమో గాని మెగా నందమూరి మల్టి స్టారర్ అయితే ఇప్పటికి లేనట్టే అంటున్నారు సినీ జనాలు.