సూపర్ స్టార్ సినిమా సుశాంత్ సింగ్ డెబ్యూ మూవీకి రీమేకా..?

సూపర్ స్టార్ రజినీకాంత్ తన కూతురు ఐశ్వర్య రజినీకాంత్ దర్శకత్వంలో ఓ సినిమా చేస్తున్న సంగతి తెలిసిందే. ''లాల్ సలామ్'' అనే పవర్ ఫుల్ టైటిల్ తో ఇటీవలే ఈ చిత్రాన్ని లాంఛనంగా ప్రారంభించారు. అయితే ఇప్పుడు ఈ సినిమాకు సంబంధించిన ఓ ఆసక్తికరమైన న్యూస్ సోషల్ మీడియాలో చక్కర్లు కొడుతోంది.

'లాల్ సలామ్' సినిమాలో రజినీది ఫుల్ లెన్త్ రోల్ కాదని మేకర్స్ టైటిల్ పోస్టర్ తోనే క్లారిటీ ఇచ్చారు. ఇందులో సీనియర్ నటుడిది ప్రత్యేకమైన అతిథి పాత్ర మాత్రమే. తమిళ్ హీరోలు విష్ణు విశాల్ మరియు విక్రాంత్ ప్రధాన పాత్రలు పోషిస్తున్నారు. వాళ్ళిద్దరికీ సపోర్ట్ గా స్పెషల్ క్యామియో రోల్ లో తలైవర్ కనిపించనున్నారు.

రజినీది గెస్ట్ రోల్ అయినప్పటికీ, కథలో కీలకంగా ఉంటుందని.. చాలా స్ట్రాంగ్ గా ఉంటుందని టాక్. అయితే 'లాల్ సలామ్' అనేది ''కై పో చే!'' అనే హిందీ చిత్రానికి రీమేక్ అని ఇప్పుడు సోషల్ మీడియాలో ప్రచారం జరుగుతోంది.

దివంగత బాలీవుడ్ నటుడు సుశాంత్ సింగ్ రాజ్ పుత్ హీరోగా నటించిన డెబ్యూ మూవీ 'కై పో చే'. అమిత్ షాద్ - రాజ్ కుమార్ రావు ఇతర ప్రధాన పాత్రలు పోషించారు. 2013లో వచ్చిన ఈ స్పోర్ట్స్ డ్రామాకి అభిషేక్ కపూర్ దర్శకత్వం వవహించారు.

క్రికెట్ నేపథ్యంలో సాగే ఈ చిత్రంలో రాజకీయ అంశాలతో పాటు మతపరమైన వివాదాస్పద సన్నివేశాలు కూడా ఉన్నాయి. అయితే ఇప్పుడు ఐశ్వర్య రజినీకాంత్ ఈ చిత్రానికి రీమేక్ గానే 'లాల్ సలామ్' తెరకెక్కిస్తున్నారనే టాక్ నడుస్తోంది.

'లాల్ సలామ్' టైటిల్ పోస్టర్ ని బట్టి ఇది క్రికెట్ బ్యాక్ డ్రాప్ లో రూపొందే సినిమా అని స్పష్టమైంది. తగలబడుతున్న హెల్మెట్ - రక్తం మరకలతో తడిసిన క్రికెట్ బ్యాట్ - గ్లోవ్స్ - బాల్ - బెయిల్ ని మనం గమనించవచ్చు. దీన్ని బట్టి 'కై పో చే' రీమేక్ అయ్యుంటుందనే సందేహాలు కలుగుతున్నాయి. దీనిపై త్వరలోనే క్లారిటీ వస్తుందేమో చూడాలి.

'లాల్ సలామ్' చిత్రాన్ని సుభాస్కరన్ సమర్పణలో లైకా ప్రొడక్షన్ బ్యానర్ లో రూపొందిస్తున్నారు. ఆస్కార్ అవార్డ్ విన్నింగ్ మ్యూజిక్ కంపోజర్ ఏఆర్ రెహమాన్ సంగీతం సమకూరుస్తున్నారు. విష్ణు రంగస్వామీ సినిమాటోగ్రఫీ నిర్వహించనున్నారు. 2023 లోనే ఈ చిత్రాన్ని ప్రేక్షకుల ముందుకు తీసుకురానున్నట్లు మేకర్స్ ప్రకటించారు.

ఇకపోతే రజనీకాంత్ ప్రస్తుతం నెల్సన్ దిలీప్ కుమార్ దర్శకత్వంలో "జైలర్" అనే యాక్షన్ డ్రామాలో నటిస్తున్నారు. సన్‌ పిక్చర్ బ్యానర్ లో కళానిది మారన్ ఈ చిత్రాన్ని నిర్మిస్తున్నారు. ఇదే క్రమంలో 'డాన్' ఫేమ్ శిబి చక్రవర్తి దర్శకత్వంలో రజినీ ఓ సినిమా చేయనున్నట్లు తెలుస్తోంది.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.