సెకండాఫ్‌ తో సూపర్‌ స్టార్ సంతోషంగా లేరా..?

సూపర్ స్టార్ మహేష్ బాబు వరుస విజయాలతో దూకుడుమీదున్నారు. తన స్టార్ పవర్ తో యావరేజ్ స్క్రిప్టులను కూడా బ్లాక్ బస్టర్స్ గా మారుస్తూ వస్తున్నారు. ఇటీవల వచ్చిన 'సర్కారు వారి పాట' సినిమా కూడా అదే కోవకు చెందింది.

అయితే మహేష్ బాబుకు సరైన స్టోరీ పడితే బాక్సాఫీస్ రికార్డ్స్ గ్యారెంటీ అని ఫ్యాన్స్ భావిస్తున్నారు. ఈ నేపథ్యంలో దర్శకులు త్రివిక్రమ్ శ్రీనివాస్ మరియు ఎస్ఎస్ రాజమౌళి లతో చేయబోయే సినిమాలతో ఆ లోటు తీరుతుందని ధీమాగా ఉన్నారు.

తనకు సన్నిహితుడైన త్రివిక్రమ్ దర్శకత్వంలో మహేష్ SSMB28 సినిమాని అధికారికంగా ప్రకటించిన సంగతి తెలిసిందే. కామెడీతో కూడిన ఫ్యామిలీ ఎంటర్టైనర్లకు పేరుగాంచిన స్టార్ డైరెక్టర్.. మహేష్ తో గతంలో 'అతడు', 'ఖలేజా' వంటి చిత్రాలను తెరకెక్కించారు.

మహేష్ - త్రివిక్రమ్ కలయికలో వచ్చిన సినిమాలను అభిమానులతో పాటుగా సాదారణ ప్రేక్షకులు కూడా విపరీతంగా ఇష్టపడతారు. దాదాపు పన్నెండేళ్ల తర్వాత ఇప్పుడు ఈ క్రేజీ కాంబోలో హ్యాట్రిక్ మూవీ వస్తుండటంతో అంచనాలు ఆకాశాన్ని తాకుతున్నాయి.

ఫిబ్రవరిలో పూజా కార్యక్రమాలతో లాంచ్ చేయబడిన మహేష్ 28వ సినిమా ఇంకా సెట్స్ మీదకు వెళ్ళలేదు. అయితే ప్రస్తుతం వెకేషన్ లో ఉన్న మహేష్ బాబు కు ఫైనల్ నెరేషన్ ఇవ్వడానికే ఇటీవల త్రివిక్రమ్ నిర్మాతతో కలసి విదేశాలకు వెళ్లినట్లు సమాచారం.

అయితే దర్శకుడు తన ఫుల్ స్క్రిప్ట్ తో సూపర్ స్టార్ ను మెప్పించలేకపోయారని టాక్ నడుస్తోంది. సెకండాఫ్ స్క్రిప్టు మహేష్ ను ఆకట్టుకోలేకపోయిందని.. కొన్ని సలహాలు సూచనలు కూడా ఇచ్చారని వార్తలు వస్తున్నాయి. అంతేకాదు మహేష్ చెప్పిన మార్పులు చేయడానికి త్రివిక్రమ్ శ్రీనివాస్ అంగీకరించారని అంటున్నారు.

అగ్ర హీరోని ఆకట్టుకునే పూర్తి స్క్రిప్ట్ తో రావడానికి కొంత సమయం కావాలని డైరెక్టర్ కోరినట్లు చెప్పుకుంటున్నారు. మేకర్స్ ఈ సినిమా షూటింగ్ జూలై నుండి షూటింగ్ ప్రారంభించాలని ప్లాన్ చేస్తున్నారని టాక్. మరి అనుకున్న టైంకి ఈ క్రేజీ కాంబో సెట్స్ పైకి వెళ్తుందో లేదో వేచి చూడాలి.

ఏదేమైనా మహేష్ బాబు ఇక నుంచి స్క్రిప్ట్ మొత్తం మెప్పించగలిగితేనే.. ముందుకు వెళ్లాలని నిర్ణయించుకున్నట్లు సన్నిహిత వర్గాలు చెబుతున్నారు. త్రివిక్రమ్ ప్రాజెక్ట్ తర్వాత ఓ భారీ బడ్జెట్ యాక్షన్ అడ్వెంచర్ చిత్రం కోసం రాజమౌళితో జతకట్టనున్నారు మహేష్. దీనికి సంబంధించిన వివరాలు ఇంకా వెల్లడించలేదు.

SSMB28 చిత్రాన్ని హారిక అండ్ హాసిని క్రియేషన్స్ బ్యానర్ పై ఎస్. రాధాకృష్ణ (చినబాబు) నిర్మించనున్నారు. ఇందులో మహేష్ సరసన పూజా హేగ్డే హీరోయిన్ గా నటించనుంది. ఎస్ఎస్ థమన్ సంగీతం సమకూరుస్తున్నారు. ఆర్. మది సినిమాటోగ్రాఫర్ గా.. నవీన్ నూలి ఎడిటర్ గా వర్క్ చేయనున్నారు. ఏఎస్ ప్రకాష్ ఆర్ట్ డైరెక్టర్ గా వ్యవహరించనున్నారు.