మూఢ‌ న‌మ్మ‌కంతో ప్రభాస్ హాలీవుడ్ ఆఫ‌ర్ కాద‌న్నాడా?

ప్ర‌భాస్ పాన్ ఇండియా స్టార్ డ‌మ్ ని ఆస్వాదిస్తున్నాడు. `బాహుబ‌లి` ఫ్రాంఛైజీతో డార్లింగ్ క్రేజ్ జాతీయ అంత‌ర్జాతీయ స్థాయిలో మార్మోగుతోంది. ప్ర‌స్తుతం ప్ర‌భాస్ న‌టిస్తోన్న సినిమాల‌న్నీ పాన్ ఇండియా కేట‌రిగీకి చెందిన‌వే. యూనివ‌ర్శ‌ల్ అప్పీల్ ఉన్న కంటెంట్ తో బ‌హుభాష‌ల మార్కెట్ ని కొల్ల‌గొట్టే ప్ర‌ణాళిక‌తో ముందుకెళ్తున్నారు. ప్ర‌భాస్ ప్ర‌ణాళిక‌లు చూసి మిగ‌తా తెలుగు హీరోలు అందే పంథాను ఎంచుకుంటున్నారు. ఆ ర‌కంగా ప్ర‌భాస్ టాలీవుడ్ హీరోల‌తో పాటు సౌత్ స్టార్ల‌కు స్పూర్తిగా నిలిచారు. ఇటీవ‌ల‌ భారీ బ‌డ్జెట్ చిత్రాల‌వైపు మ‌న‌సు మ‌ళ్లేలా చేయ‌డంలో బాహుబ‌లి స్టార్ ప్ర‌భాస్ 100 శాతం స‌క్సెస్ అయ్యారు. త‌దుప‌రి `ఆది పురుష్` చిత్రంతో డార్లింగ్ బాలీవుడ్ లోనూ ఎంట్రీ ఇస్తున్నారు.

500 కోట్ల బ‌డ్జెట్ తో చిత్రాన్ని టీ-సిరీస్ నిర్మిస్తోంది. ఓంరౌత్ ఈ చిత్రానికి ద‌ర్శ‌క‌త్వం వ‌హిస్తున్నారు. ఈ సినిమా త‌ర్వాత ప్ర‌భాస్ బాలీవుడ్ లో ప‌లు క్రేజీ ఫ్రాంఛైజీ చిత్రాల‌కు సంత‌కాలు చేసే అవ‌కాశం ఉంద‌ని స‌మాచారం. ఈ నేప‌థ్యంలో పాన్ ఇండియా స్టార్ పాన్ వ‌ర‌ల్డ్ స్టార్ గా ఎదిగే మ‌రో అరుదైన అవ‌కాశం వ‌చ్చింది.

ప్ర‌భాస్ కోసం ఏకంగా ప్ర‌ఖ్యాత హాలీవుడ్ ప్రొడ‌క్ష‌న్ హౌసే దిగొచ్చింది. ఆయ‌న‌తో ఓ హార‌ర్ చిత్రాన్ని నిర్మించ‌డానికి రెడీగా ఉంది. బ్రీఫ్ గా ప్ర‌భాస్ కి స్టోరీ లైన్ కూడా వినిపించారు. కానీ డార్లింగ్ నుంచి ఇంకా గ్రీన్ సిగ్నల్ రాలేదు. దీంతో ప్రాజెక్ట్ అలా పెడింగ్ లో ఉన్న‌ట్లు తెలుస్తోంది. ఓటీటీ వేదిక‌గా ఎన్నో ఎంట‌ర్ టైన్ మెంట్ ప్రోగ్రామ్స్ నిర్మిస్తున్న ప్ర‌ముఖ హాలీవుడ్ నిర్మాణ సంస్థ ఇటీవ‌ల భార‌త్ లోనే బాగా ఫేమ‌స్ అయింది.

అయితే ఆ సంస్థ పేరు బ‌య‌ట‌కు రాలేదు గానీ..ప్ర‌భాస్ కి వ‌చ్చిన ఆఫ‌ర్ మాత్రం వాస్త‌వ‌మ‌ని తెలుస్తోంది. ప్ర‌భాస్ ఒకే చెబితే గ‌నుక హుటా హుటిన ఈ ప్రాజెక్ట్ ని ప‌ట్టాలెక్కించాల‌ని నిర్మాణ సంస్థ భావిస్తుంది. అయితే ఇది ఓ హార‌ర్ థ్రిల్ల‌ర్ కాన్సెప్ట్ అని తెలుస్తోంది. ఈ లైన్ పై ప్ర‌భాస్ సానుకూలంగా లేడ‌న్న వార్త వినిపిస్తోంది. దెయ్యాలు.. హార‌ర్ చిత్రాలంటే ప్ర‌భాస్ కి భ‌యం అని..త‌న‌కి కొన్ని మూఢ‌ న‌మ్మ‌కాలు కూడా ఉన్నాయ‌ని.. ఆ కార‌ణంగాను డార్లింగ్ వెన‌క్కి త‌గ్గే అవ‌కాశం సంకేతాలు పంపిన‌ట్లు గుస‌గుస‌లు వినిపిస్తున్నాయి. అయితే మూఢ‌న‌మ్మ‌కాలు కార‌ణ‌మా లేక ఇప్పుడున్న బిజీ షెడ్యూల్స్ వ‌ల్ల కాద‌న్నాడా? అన్న‌ది క్లారిటీగా వెల్ల‌డించాల్సి ఉంది. ప్ర‌స్తుతం నాగ్ అశ్విన్ సైన్స్ ఫిక్ష‌న్ సినిమాతో ప్ర‌భాస్ పాన్ వ‌రల్డ్ స్టార్ కానున్న నేప‌థ్యంలో హార‌ర్ చిత్రంపై ఆసక్తిని క‌న‌బ‌ర‌చ‌లేద‌ని కూడా భావించాల్సి ఉంటుంది.

అయినా అంత తీరిక ఎక్క‌డిది?

ప్ర‌భాస్ బ్యాక్ టు బ్యాక్ పాన్ ఇండియా సినిమాల‌కు గ్రీన్ సిగ్న‌ల్ ఇచ్చేస్తున్నారు. ఓవైపు ఆదిపురుష్‌.. మ‌రోవైపు సలార్.. ఈ రెండిటి న‌డుమ ప్రాజెక్ట్-కె ప్రారంభ‌మైంది. ప్ర‌భాస్ నాన్ స్టాప్ షెడ్యూల్స్ ఆశ్చ‌ర్య‌ప‌రుస్తున్నాయి. రాధేశ్యామ్ చిత్రాన్ని 2022 సంక్రాంతికి వాయిదా వేసి రిలాక్స్ డ్ గా మూడు సినిమాల చిత్రీక‌ర‌ణ‌ల‌తో బిజీ అయ్యాడు డార్లింగ్. ప్ర‌భాస్ ప్ర‌స్తుతం ఆదిపురుష్ 3డి.. స‌లార్ చిత్రీక‌ర‌ణ‌ల కోసం అటూ ఇటూ హ‌డావుడిగా ప్ర‌యాణిస్తున్నారు.

మ‌రోవైపు ఆదిపురుష్ త‌ర్వాత‌ ప్రభాస్ న‌టించే రెండవ హిందీ ప్రాజెక్ట్ సిద్ధార్థ్ ఆనంద్ తోనే ఉంటుంద‌ని బ‌లంగా క‌థ‌నాలొస్తున్నాయి. ఇటీవ‌ల‌ ప్రభాస్ - సిద్ధార్థ్ న‌డుమ ప‌లుద‌ఫాలుగా చర్చలు సమావేశాలు పూర్త‌య్యాయి. ఇక ప్రాజెక్ట్ ఖాయ‌మైన‌ట్టేన‌ని అంతా భావించారు. తాజా స‌మాచారం మేర‌కు ప్రభాస్ 24 కోసం రంగం సిద్ధం చేయ‌నున్నార‌ని గుస‌గుస‌లు వినిపిస్తున్నాయి. ప్రకటన సెప్టెంబర్ లో ఉంటుంద‌ని క‌థ‌నాలొస్తున్నాయి. ప్రభాస్ ఈ చిత్రంలో రా ఏజెంట్ గా కనిపిస్తాడని మైత్రి మూవీమేక‌ర్స్ పాన్ ఇండియా కేట‌గిరీలో నిర్మించేందుకు దాదాపు 300కోట్ల బ‌డ్జెట్ ని పెట్ట‌నుంద‌ని గుసగుస‌లు వినిపిస్తున్నాయి. సిద్ధార్థ్ ఆనంద్ తో ఒప్పందాన్ని ఖ‌రారు చేసుకుని అతనికి మైత్రి సంస్థ‌ అడ్వాన్స్ కూడా చెల్లించింది. దీనికి అధికారిక ప్రకటన వెలువ‌డాల్సి ఉంటుంది.