షారూక్‌ ను కాపాడ‌బోతున్న స‌ల్మాన్?

షారూక్ ఖాన్ ట్యాగ్ లైన్ ఏంటీ అన‌గానే.. తెలిసిన వారెవరైనా 'బాలీవుడ్ బాద్షా' అంటారు. మరి, ఆ ట్యాగ్ లైన్ ఇప్పుడు కూడా కొన‌సాగించొచ్చా? అంటే మాత్రం కాస్త సైలెంట్ అవుతారు. దీనికి కార‌ణం.. షారూక్ ఎదుర్కొంటున్న వైఫ‌ల్యాలే! షారూక్ నిఖార్సైన హిట్ చూసి ఎన్ని సంవ‌త్స‌రాలైందో? కొన్నేళ్లుగా వరుస పరాజయాలు చవిచూస్తున్న షారూక్.. సక్సెస్ రేట్లో ఎక్కడికో పడిపోయాడు. దీంతో.. రెండు సంవ‌త్స‌రాలుగా సినిమానే చేయ‌లేదు.

అంత గ్యాప్ త‌ర్వాత చేస్తున్న మూవీ 'ప‌ఠాన్‌'. ప్రముఖ బ్యానర్ సంస్థ యశ్ రాజ్ ఫిలిమ్స్ నిర్మిస్తున్న ఈ చిత్రాన్ని 'వార్‌' సినిమాతో బంపర్ హిట్ కొట్టిన సిద్ధార్థ్ ఆనంద్ తెర‌కెక్కిస్తున్నారు. ఈ మూవీలో షారూక్ గూఢ‌చారి పాత్ర‌లో న‌టిస్తున్నాడు. అయితే.. లేటెస్ట్ అప్డేట్ ఏమంటే.. ఈ చిత్రంలో మ‌రో స్టార్ హీరో స‌ల్మాన్ ఖాన్ కూడా క‌నిపించ‌బోతున్న‌ట్టు స‌మాచారం.

వీరిద్ద‌రూ క‌లిసి గ‌తంలో ప‌లు మ‌ల్టీస్టార‌ర్ సినిమాల్లో న‌టించారు. ఒక‌రి సినిమాలో మ‌రొక‌రు క‌నిపించి ఫ్యాన్స్ కు అద్దిరిపోయే కిక్కిచ్చిన సంద‌ర్భాలు ఉన్నాయి. ఇప్పుడు మ‌రోసారి వీరిద్ద‌రూ క‌లిసి క‌నిపించ‌బోతున్నార‌నే వార్త ఇప్పుడు అభిమానుల‌ను ఆనందంలో ముంచెత్తుతోంది.

ఈ సినిమాలో గూఢ‌చారిగా ఉన్న షారూక్‌.. ఓ ఆప‌రేషన్ సంద‌ర్భంగా చిక్కుల్లో ప‌డ‌తాడ‌ట‌. ర‌ష్య‌న్ మాఫియా నుంచి ఈ ముప్పు వ‌చ్చిప‌డుతుంద‌ని స‌మాచారం. ఈ స‌మ‌యంలో స‌ల్మాన్ అద్దిరిపోయే ఎంట్రీ ఇచ్చి సేవ్ చేస్తాడ‌ట‌. ఆ త‌ర్వాత ఇద్ద‌రూ క‌లిసి విల‌న్లు తుక్కు రేగ్గొడ‌తార‌ని టాక్‌. ఆన్ స్క్రీన్ ఖాన్ ద్వ‌యం చేసే ఫైటింగ్ అభిమానుల‌కు ఫుల్ ఫీస్ట్ అన‌డంలో సందేహ‌మే లేద‌ట‌.

షారూక్ సినిమాలో స‌ల్మాన్ అంటే.. బాలీవుడ్‌ వైబ్రేష‌న్స్ పీక్ స్టేజ్ లో ఉండ‌డం ఖాయం. మ‌రి, సినిమాలో షారూక్ ను కాపాడ‌డంతోపాటు.. డీప్ ట్ర‌బుల్స్ ఉన్న బాద్షా కెరీర్ ను పైకి లేపేందుకు కూడా ఓ చెయ్యి వేస్తాడేమో చూడాలి.