ఇలాంటి తొందరపాటు నిర్ణయాలు ఎందుకు శ్రీలీలా?

పెళ్లిసందD సినిమాతో హీరోయిన్‌ గా తెలుగు ప్రేక్షకులకు పరిచయం అయిన కన్నడ ముద్దుగుమ్మ శ్రీలీలా. ఈ అమ్మడికి తెలుగు మూలాలు ఉన్నాయి అంటూ ఆ మధ్య ప్రచారం జరిగింది. ఆ విషయం పక్కన పెడితే మొదటి సినిమా డిజాస్టర్ అయినా కూడా శ్రీలీలా కు వరుసగా ఆఫర్లు వస్తున్నాయి. అందంతో పాటు మంచి ఫిజిక్ స్కిన్‌ షో చేసిన సమయంలో చూపు తిప్పుకోనివ్వని ఆకర్షణ ఆమె సొంతం.

సాదారణంగా అయితే మొదటి సినిమా నిరాశ పర్చితే చిన్నా చితకా సినిమాలు కొన్ని వచ్చి ఆ తర్వాత కనిపించకుండా పోతారు. అంతే కాకుండా సెకండ్‌ హీరోయిన్ పాత్రలు చేసి కొన్నాళ్ల తర్వాత కనుమరుగు అవ్వడం మనం చూశాం. కానీ శ్రీ లీలా మాత్రం మొదటి సినిమా నిరాశ పర్చినా కూడా చేతిలో దాదాపుగా అరడజను సినిమాలు పెట్టుకుని ఉంది.

తాజాగా సూపర్‌ స్టార్‌ మహేష్ బాబు యొక్క సినిమాలో కూడా ఛాన్స్ దక్కింది. శ్రీలీలాకు త్రివిక్రమ్‌ రెండవ హీరోయిన్‌ ఛాన్స్ ఇచ్చాడు. ఆమె ప్రస్తుతం ఉన్న స్థాయికి రెండవ హీరోయిన్‌ పాత్రలు అవసరం లేదు. అయినా కూడా మమేష్ బాబు హీరో అని.. త్రివిక్రమ్‌ దర్శకత్వంలో సినిమా అంటూ శ్రీలీలా కమిట్‌ అయ్యింది అంటూ వార్తలు వస్తున్నాయి.

శ్రీలీలా ఇలా తొందరపాట చర్యల వల్ల కెరీర్‌ కే ప్రమాదం వాటిల్లే అవకాశం ఉంది అంటూ ఇండస్ట్రీ వర్గాల వారు మాట్లాడుకుంటున్నారు. ఒక సారి సెకండ్‌ హీరోయిన్ గా సినిమాలకు కమిట్‌ అయితే ముందు ముందు అన్నీ కూడా అవే అవకాశాలు వస్తాయి కదా అంటూ కొందరు కామెంట్స్ చేస్తున్నారు.

త్రివిక్రమ్‌ సినిమాల్లో సెకండ్‌ హీరోయిన్‌ పాత్రకు పెద్దగా ప్రాముఖ్యత ఉండదు. ఏదో గ్లామర్ డాల్‌ అన్నట్లుగా కూడా కాకుండా కథలో ఏదో అలా అలా భాగం చేస్తూ పాత్రను ముగిస్తాడు. కనుక ఇప్పటి వరకు త్రివిక్రమ్‌ దర్శకత్వంలో వచ్చిన సినిమాల యొక్క సెకండ్‌ హీరోయిన్ పాత్రలకు మంచి పేరు వచ్చిందే లేదు అంటూ కొందరు అభిప్రాయం వ్యక్తం చేస్తున్నారు. శ్రీలీలా కు త్రివిక్రమ్‌ సినిమా ఎలాంటి ఫలితాన్ని ఇస్తుందో చూడాలి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.